Home Hudicial Lo bay scucha algun testigo den caso di Hindu sospecha di a...

Lo bay scucha algun testigo den caso di Hindu sospecha di a forza muher ilegal traha

746
0
SHARE
- Advertisement -

ORANJESTAD (AAN) – E homber H.S. di India y su señora A.K.T.S. a presenta dilanti Hues pa acusacionnan serio cu Ministerio Publico tin contra nan.

E caso tabata mas bien pa scucha peticion di abogado mr. Lejuez pa cu scuchamento di testigonan.

Ta asina cu Fiscal a rechaza un gran parti mientras cu Hues a aproba algun pa wordo scucha. Un di esnan cu e abogado kier a scucha como testigo, tabata sinta den sala di Corte pero net esey a keda rechaza pa Hues.

FORZA MUHER ILEGAL TRAHA BOU MENAZA

E acusacion cu Fiscal a presenta contra e pareha ta cu entre 1 Maart 2017 y 23 October 2017 a trafica hende for di India. A forza un dama, A., pa traha y bou menaza y a saca probecha di dje. A laga e muher hospeda ilegal na nan cas como cria.

Tambe Fiscal ta acusa e pareha cu entre 22 Februari 2017 y 15 Maart 2017, a falsifica documentonan.

Abogado mr. Lejuez a representa e pareha mientras cu abogado mr. Hart a representa e victima.

ABOGADO KIER SCUCHA TESTIGONAN

Hues a bisa cu ta un “regiezitting”. Esey kiermen cu no ta bay trata e caso sino ta scucha kico abogado kier pa haci ainda di investigacion promer cu e tratamento di e caso. Abogado mr. Lejuez a haci peticionnan pa laga scucha scucha testigonan y Fiscal a reacciona riba esakinan.    E abogado a pidi pa scucha como testigo e dama A. y dos homber esta F. y E. cu tambe ta wordo menciona den e caso. Nan a bin cu e dama A. for di India Aruba. E abogado ta haya cu F. y E. por bisa con A. a bin Aruba. Na opinion di e abogado nan lo por bisa cu e dama A. no a wordo forza sino a bin voluntario. E abogado a sigui bisa cu e dos hombernan tambe tabata kedando na e cas y por bisa si enberdad A. a wordo forza of menaza.

Abogado mr. Lejuez a mustra cu A. lo a bisa cu e dama S. a benta azeta cayente riba su pia. E abogado kier pa scucha testigonan si nan a mira esey y si a mira A. cu pia den verband y si e tabata cana manca. Tambe e kier pa puntra e dos hombernan si A. tabata wordo paga of no.

Ademas e abogado kier pa scucha e dama B. cu tambe tabata kedando na e cas y por bisa cu si a duna A. oportunidad bay bek India na Mei 2017 hunto cu F. y E., pero cu A. a bisa cu e kier keda Aruba. Segun e abogado, A. lo a bisa cu e pareha S. a bis’e cu no tin ticket pa e bay bek India. E abogado a menciona mas testigonan cu tabata bishita e cas cu frequencia, kendenan na opinion di e abogado, lo por bisa con e situacion na e cas tabata. E abogado a bisa cu e testigonan aki lo por trece claridad y mustra cu A. no a bisa e berdad.

Abogado mr. Lejuez a reclama na Hues cu su cliente, e homber S., a haya su cellular bek pero tur su mensahenan whatsapp a disparce. E ta haya e mensahenan hopi importante pa su defensa. E homber S. a reclama na Hues cu Polis a copia tur su potretnan y mensahenan di whatsapp sin cu el a haya su mensahenan whatsapp bek y cu e falta mas cu 60 potret. E ta haya esaki inhusto pasobra ta perhudica nan den nan defensa. El a bisa cu e no ta confia Polis pero e ta spera cu Hues lo sa di haci husticia.

AGENTE SCUCHA COMO TESTIGO

Den sala di Corte tabata presenta un Hulandes kende ta e agente cu tabata envolvi den e investigacionnan. El a reacciona cu loke S. ta bisa cu no corecto. El a splica na Huez cu no ta asina cu a kita e mensahenan. E agente a splica cu na ultimo, e tecniconan a logra haya un “update” cu a haci posibel pa copia e mensahenan y cu nan tin esakinan. El a bisa cu tin un procesverbaal traha riba esaki. Aparentemente Hues y abogado no a haya e procesverbaal aki ainda.

REACCION DI FISCAL

Fiscal a bisa Hues cu e tin duda riba e peticionnan cu abogado a haci. Na opinion di Fiscal, e no tin problema pa scucha e dama A. como testigo. Fiscal ta haya cu e hombernan F. y E. no por bisa nada con e comunicacion entre e dama A. y e pareha S. ta. Fiscal a bisa cu e otro testigonan no por bisa con e relacion entre A. y e pareha S. tabata. E ta haya cu e dama B. si lo por duna algun informacion cu por ta importante. Fiscal a bisa cu miembro di Recherche a haci su trabou manera mester ta y no ta asina cu a copia whatsapp di e dama A. y tambe pa mantene privacidad di e dama A. no ta duna esaki. Ta asina cu a saca potret di e mensahenan. El a bisa cu abogado si por mira e mensahenan di whatsapp.

DECISION HUES

Hues a bisa cu el a studia e peticionnan bon. E ta haya cu e dama A. y e dama B. mester wordo scucha. Contrario cu Fiscal, Hues ta haya cu e hombernan F. y E. tambe mester wordo scucha pasobra nan tabata kedando den e cas hunto cu A. E otronan ta wordo rechaza pasobra nan no por bisa nada. Hues a bisa cu abogado mr. Lejuez lo por mira e backup di e dama A. Tin un procesverbaal di e whatsapp di homber S.

Hues a manda e caso pa Hues Comisario pa scuca e testigonan. A pospone e caso pa un tempo no defini. Asina cu e interogacionnan keda cla lo bay fiha un fecha pa tratamento di e caso.

 

- Advertisement -

DUNA COMENTARIO

Please enter your comment!
Please enter your name here