Home General Mary Joan Foundation ta confirma aumento den cantidad di cliente cu cancer...

Mary Joan Foundation ta confirma aumento den cantidad di cliente cu cancer di pecho

327
0
SHARE
- Advertisement -

Presidente, Arabella Colina: “Stress ta cuminda pa cancer”

ORANJESTAD (AAN):  Cifranan actualiza relaciona cu cancer di pecho no ta conoci. Pero loke si ta conoci ta cu tin hopi caso na Aruba.

Arabella Colina, Presidente di Mary Joan Foundation a duna di conoce cu lamentablemente e estadisticanan cu tin aworaki na Aruba, oficialmente ta for di 2014. Kiermen, cifra actual no tin.

A indica cu esaki ta un asunto cu ta cay bao di gobierno. Gobierno tin cu bay haci e sondeo pa comunidad por sa precis. Aworaki toch, Gobierno ta bezig hunto cu PAHO y otro instancianan pa asina yega na un registro nacional di e casonan di cancer na Aruba.

Mary Joan Foundation mes ta hayando hopi cliente. Antes, Colina a splica, MJF tabata haya un of dos cliente pa luna. Pero aworaki pa siman, nan ta haya 2 y den luna di October, tur dia nan ta haya algun persona cu ta acerca e fundacion.

Pa loke ta hende homber, el a señala cu hende homber no ta yega asina lihe, pero si tin algun cu ta acerca. Tin casonan di hende homber cu a fayece caba, di cancer di pecho. Pesey el a confirma cu na Aruba si tin hende hombernan cu cancer di pecho.

Tin casonan di hende jong, bao di 30 y hasta bao di 20 aña. Pesey Mary Joan Foundation kier bay pone mas enfasis ariba e hubentud.

Tin e creencia cu cancer di pecho ta sosode cerca hende cu ta den edad di menopause. Pero cu tempo, e edad a baha.

E motibo precis no ta conoci, “pero un cos si mi por bisa, stress ta cuminda pa cancer. Esey ta algo cu nos tin cu purba di ta conciente y baha stress un poco. Bin un spa, pasobra si nos ta bon, si nos ta stima nos mes, nos por comparti esey cu otronan y un spa no ta un luho. E ta un necesidad. Si bo sa cu bo ta traha duro, bo tin cu haci’e pa bo mes”, e representante di Mary Joan Foundation a remarca.

Colect tur diasabra

Arabella Colina, Presidente di MJF a indica cu cualkier persona cu kier bira boluntario pa participa den e colecta por tuma contacto cu e fundacion.

Pa di 4 aña Mary Joan Foundation ta organizando nan colect tur diasabra na diferente localidad na Aruba.

El a probecha pa gradici The Ritz – Carlton Hotel ya cu esaki ta e di tres aña cu varios boluntario di e hotel ta yuda nan cu e colecta.

“Esey ta algo hopi bunita. Un danki pasobra e ta un hotel asina grandi y bo ta wak e parti humano cu pa nan ta importante, pasobra nan tambe ta para keto un rato y concientiza y tambe yuda nos colect”, Sra. Colina a finaliza bisando.

 

- Advertisement -

DUNA COMENTARIO

Please enter your comment!
Please enter your name here