Home Hudicial Mayan sentencia ta cay pa homber envolvi den preparacion di atraco arma...

Mayan sentencia ta cay pa homber envolvi den preparacion di atraco arma y droga

188
0
SHARE
- Advertisement -

ORANJESTAD (AAN):  E homber Dominicano biba na Aruba, R.D.P.(23), mayan mainta lo mester presenta dilanti Hues pa scucha su sentencia. Ta asina cu Fiscal ta haya R.D.P. culpable di un serie di delito y a exigi 5 aña di prison, mas pa ehecuta e 1 aña condicional cu R.D.P. tabatin pendiente.

PLAN PA ATRACO ARMA

Durante tratamento di e caso a sali na cla cu Polis a bay haci razia na e cas unda R.D.P. ta keda y a bin haya un cantidad di cos na e cas entre otro droga. E motibo cu a bay haci e razia ta pasobra cu anterior a para R.D.P. den un pick up den cual den e baki tabatin un brommer. Doño di e brommer a haci denuncia di ladronicia.

Mas investigacion a mustra cu den cellular di R.D.P. ta mustra cu R.D.P. ta forma parti di un grupo cu tabata haci cantidad di delitonan. Den su cellular a haya varios mensahe entre otro 5 Maart 2019 di un plan pa haci un atraco arma riba un joyeria.

Ora Hues a puntra R.D.P. riba esaki, el a bisa cu e no kier bisa nada riba esey. Fiscal a mustra cu 4 Februari 2019 a horta un Jeep y un cellular. A haya e yabi di e Jeep na cas di R.D.P.  E sospechoso a bisa Hues cu e ta traha riba auto y di tur e yabinan cu e tin, net esey ta di e Jeep? Fiscal a bisa cu tin un raport apart cu ta mustra cu e doño a reconoce e yabi di e Jeep y su cellular. R.D.P. ta para riba cu e cellular ta di dje.

ARMANAN DI CANDELA

Hues a mustra cu den e cellular a haya diferente potret di R.D.P. cu arma den man. Hasta potret di un mucha riba cama. Hues a reclama ta kico esaki ta! Segun R.D.P., ta arma di brothernan di bario. Hues a remarca cu for di e mensahenan R.D.P. ta papia di un arma cu no ta saca bala. Tin papiamento con mester traha cu e arma. Segun R.D.P. ta su brothernan. Tambe tin mensahe caminda ta papia di otro arma. Segun R.D.P., ta pronk e ta pronk cu arma. Hasta tin un grabacion riba e cellular caminda cu R.D.P. ta canta cu e lo tira. Tambe a haya potret caminda e ta mustra balanan y otro potretnan cu e ta manera tira. Hues a mustra cu tin whatsapp caminda ta papia di mester busca arma. Tambe cu e ta papia cu su mama cu e ta bin laat pasobra tin Polis ta controla. E mama ta bis’e pa bay poco poco cu e arma cu e tin cun’e.

CASTIGO PENDIENTE

Hues a bisa cu na 2017, R.D.P. a haya condena pa ladronicia y 21 Augustus 2018 el a sali liber, cu tempo di prueba di 2 aña. Fiscal pidi pa e 1 aña condicional bin aserca di e castigo cu lo bay pidi awor. Segun R.D.P. door di problema cu mayornan y su tata a dal’e te mand’e hospital tempo e tabatin 14 aña, e no ta biba serca su mayornan. E ta haya cu su mayornan no ta dun’e nada y pesey tempo e tabatin 17-18 aña el a bay for di cas y ta biba cu amigonan.

EXIGENCIA DI FISCAL

Fiscal a bisa Hues cu R.D.P. ta culpable di ladronicia di e brommer BMW y cu R.D.P. ta responsabel pa e lote di marihuana cu a haya na e cas. Fiscal ta haya proba e plannan pa un asalto arma riba un joyeria.

A haya yabi di un Jeep cu a wordo horta na Februari 2019 dilanti un club nocturno y tambe a haya e cellular di e dama doño di e Jeep.

Fiscal a sigui bisa cu e ta haya R.D.P. culpable di posecion di armanan di candela y balanan. Tin combersacion di R.D.P. cu un homber E. cu actualmente ta sera na KIA pa matamento tocante armanan.

Fiscal a remarca cu R.D.P. ta blo bisa cu e tabata pronk, pero Fiscal ta haya cu R.D.P. ta culpable. Fiscal a bisa cu awor a logra para R.D.P. di haci un asalto arma.

El a mustra cu recien a condena R.D.P. pa un serie di ladronicianan, pero toch R.D.P. a sigui. Fiscal a pidi Hues pa ehecuta e 1 aña condicional pasobra R.D.P. a haci delitonan den tempo di prueba.

Fiscal ta haya cu Aruba ta mas sigur cu R.D.P. ta sera den KIA, pasobra R.D.P. kier pronk cu maldadnan. El a exigi 5 aña di prison y e 1 aña condicional.

En total ta 6 aña di prison cu Fiscal a exigi. Mayan, 25 di October 2019, Hues ta dicta sentencia y DIARIO lo informa lectornan di kico e decision di Hues ta.

 

- Advertisement -

DUNA COMENTARIO

Please enter your comment!
Please enter your name here