Jessy Ras, Director di Oficina di SVT
ORANJESTAD (AAN): Director di Oficina di SVT, Jessy Ras a splica cu nan proyecto di formacion social a sigui pa motibo di e necesidad grandi pa saca hobennan cu tin diferente problema di comportacion.
E proyecto aki ta hopi positivo pa hobennan. E grupo di 12 a cuminsa na April di 2019 ta bay caba cu e prome parti, cu ta dura 4 luna, cu ta e parti militar. Ras a indica cu nan a cuminsa cu un grupo di 20 hoben, y pa di dos fase, 14 hoben ta bay participa.
Actualmente tin 10 hoben haciendo e trayecto ainda, nan a cuminsa cu stage di biaha ora nan a caba cu prome parti, y awo nan ta bayendo stage cerca diferente compania y nan ta hayando diferente curso durante siman.
Ras a bisa cu semper nan ta traha duro pa e hobennan completa e proyecto, nan ta involucra mayornan, instancianan cu ta bezig cu e hoben y nan mes ta papia hopi cu nan, pa asina purba di sigui motiva nan. E lidernan tin varios aña di experiencia trahando cu hobennan y nan ta purba di tur manera pa mantene e hobennan, pero tin cu si nan ta dicidi di sali y nan no por haci nada.
Corda cu ta den mannan di e hoben pa cambia nan bida. El a agrega cu tin biaha bo ta traha hopi duro cu e hobennan aki, pero si nan mes no kier cambia nan bida, no tin hopi cos cu nan por haci.
Nan a cuminsa cu un grupo cu a ‘dropout’ dus cu no ta bay scol, y no tin un diploma di scol secundario, pa asina nan por haya un oportunidad den mundo laboral.
E biaha aki nan a dicidi di amplia e doel groep aki, pa inclui hobennan cu a caba scol, pero no ta hayando un oportunidad pa haya trabao. Ras ta urgi e hobennan aki pa bin aplica cerca nan, pa nan por haya e parti di disciplina, parti di structura, traha den team y con pa traha un trabao, nan por ta mihor para riba nan sapatonan.
Pa cualkier mayor of famia cu ta interesa den e programa, nan por busca informacion riba nan Facebook page of yama na Mariniers Kazerne. Nan tin un procedura di seleccion, pa wak si e hoben por forma parti di e grupo. Actualmente nan ta deliberando si nan ta aumenta e grupo na 24 pa 30 hoben, pero esaki tambe ta depende di e inscripcion.
