Dr. Wilmer Salazar: “Inversion ta costa hopi placa, pero ta un necesidad”
ORANJESTAD (AAN): Dr. Wilmer Salazar, di Departamento di Salud Publico a elabora ampliamente ariba e raport cu Organizacion Panamericano di Salud (PAHO) a elabora pa Aruba den cuadro di e situacion di dump.
Salazar a duna di conoce cu den e evaluacion cu e experto di PAHO a haci, el a bisa cu tin diferente impacto den diferente sector. Un di nan ta e sector ambiental manera flora, fauna, e paisahe, e poblacion mes tocante salud. Tambe ariba economia pasobra e casnan cu tin eynan ta baha di prijs y ta devalua.
Tin impacto ariba turismo ya cu e dump ta cerca di ciudad y e bista ta algo mahos, Dr. Salazar a remarca.
El a sigui bisa cu e dump ta altera e eco-sistema y ta afecta e poblacion. Ta causa mas problema den salud. Mayoria di e kehonan na un inicio tabata problemanan respiratorio, problema di asma, holor, muscanan cu ta na cantidad eynan, djaca, cachonan cu ta cana rond buscando cuminda locual ta un transmisor potencial di malesanan.
Den principio tin 9 sector di impacto cual ta salud, medio ambiente, bestianan cu ta biba den becindario, flora, awa, aire, suela, economia, seguridad. E doctor a expresa cu e informa tabata uno basta cla y a bisa bon cla loke a wak y loke a experencia.
E experto di PAHO a bin cu su conclusionnan y recomendacionnan al caso, Dr. Wilmer Salazar a manifesta. E ‘Waste Management Team’ ta trahando paralelo y a base di esey tur a yega na un conclusion cu Parkietenbos mester cera definitivamente, Salazar a remarca.
Busca un otro tereno pa bay haci mesun cos no ta lo ideal, a bisa, Ideal ta traha cu e tecnologia moderno pa por evita daño na salud di hende y na medio ambiente.
Mester inverti, y esaki ta costa hopi placa, pero ta un necesidad pa henter Aruba. “Contaminacion no solamente por causa problemanan respiratorio. Tambe lo por causa problema genetico, cambio genetico”, Salazar a subraya.
E problema mas grandi cu e ta wak akinan ta ley, ya cu no tin ley, no tin norma, ni guia. Si no tin un ley, un normativa, e hende cu ta genera e material di desperdicio ta responsabel y esnan cu lo bay procesa tambe mester cumpli cu normanan di medio ambiente, di salud y bienestar en general.
Si no haci esey, pa mas plannan cu por tin y pa mas programanan, no ta bale la pena. Pesey mester cuminza prome cu e ley pa por garantiza bienestar, calidad di salud y despues por sigui cu lo demas, Dr. Wilmer Salazar a declara.
