ORANJESTAD(AAN): Minister di Husticia Andin Bikker durante e conferencia di prensa di tur Dialuna a bisa cu e siman cu a pasa el a ricibi bishita di Interpol.
Esaki relaciona cu e servicio NCTVI cu a wordo institui na Aruba, pa entre otro seguridad di cyber crime y combatimento di terorismo, cu e ‘hala’ di Interpol.
“E cooperacion internacional aki den un mundo cambiante cu ta evoluciona y cu tin diferente dimension tambe cu criminalidad ta bay online, nos por uza tur e cooperacion a base di igualdad mutuo cu nos por haya”.
“Den e caso aki nos ta explorando con mas nos por duna un contenido na e cooperacionnan aki”.
Esaki segun Bikker, kende a indica cu algun siman pasa ora cu e tabata na Washington, el a explora e posibilidad riba mas cooperacion cu Merca, mirando tambe cu e ta e partner economico mas grandi di Aruba.
“Tin diferente acuerdo caba cu nos ta premira cu nos lo bay yega na dje”.
“Nos ta explorando tambe e posibilidadnan pa presenta cierto aplicacionnan na e organo internacional di Interpol pa nos formaliza e ampliacion di cooperacion”, segun e mandatario.
