Home Gobierno Minister Dangui Oduber a anuncia cu e proyecto “Hoben activo, hoben feliz”...

Minister Dangui Oduber a anuncia cu e proyecto “Hoben activo, hoben feliz” lo wordo expande

32
0
SHARE
- Advertisement -

E lo bay na tur distrito despues di orario escolar:

ORANJESTAD (AAN)—Den conferencia di prensa di gobierno, Diahuebs 17 di October, Minister Dangui Oduber, titular di Salud, Turismo y Deporte, a elabora tocante diferente temanan cu ta regarda su cartera, y tambe, riba pregunta, a toca e tema di e Dia Internacional di Lucha contra Cancer na Pecho, cu ta Diasabra awo 19 di October.

Minister Dangui Oduber a referi na e expansion di un proyecto mirando esaki como un bon noticia. Ta trata aki di un proyecto piloto cu su ministerio a cuminza aña pasa cu yama “Hoben activo, hoben feliz”.

Esaki ta un programa despues di scol pa stimula nos hobennan haci movecion via diferente disciplina deportivo.

E mandatario a señala cu e proyecto aki a cuminza na IBISA San Nicolas, y e ta pa ofrece e muchanan deporte gratis despues di orario escolar.

E mandatario a splica cu e proyecto piloto aki a resulta di ta sumamente exitoso, y despues di e resultado aki e mandatario a sinta hunto cu IBISA cu ta e instancia cu ta haci e proyecto aki posible, den bon cooperacion cu Ministerio di Salud y Deporte.

Asina a keda dicidi pa expande e proyecto aki na mas mucha den mas bario, y aworaki e lo sigui den Bario Dakota na YMCA.

E siman cu ta bin e proyecto aki “Hoben activo, hoben feliz” lo bolbe cuminza na San Nicolas y mescos na Dakota.

E disciplinanan di deporte, cu lo tin e diferente simannan, lo ta ping pong, baseball, softball, atletismo y karate.

E mandatario a menciona cu tur esaki ta den cuadro di e Plan Nacional di Prevencion di Salud.

Minister di Salud a splica cu e Plan Nacional di Prevencion di Salud tambe ta un proyecto cu gobierno a traha e ultimo añanan aki, den bon cooperacion cu Pan American Health Organization (PAHO).

E plan aki lo wordo implementa na aña 2020. Minister Dangui Oduber a subraya cu ta masha importante pa, na e momentonan aki, enfoca riba prevencion di salud ya cu segun tur e pronosticonan di AZV, simplemente si nos ciudadanonan no cambia nan estilo di biba, e fondo lo no ta sostenible mas.

Anualmente, segun e proyeccionnan medico, e gastonan ta keda aumenta cu 4%. Gobierno kier keda garantiza e sostenibilidad di e seguro medico general, unda tiki pais na mundo tin un cobertura manera AZV ta ofrece na nos comunidad.

Pesey tambe gobierno a traha riba e plan nacional di prevencion cu na un manera hopi activo lo bay tin campañanan di concientizacion, pa brinda informacion na comunidad pa haci mas ehercicio, como mas saludable.

- Advertisement -

DUNA COMENTARIO

Please enter your comment!
Please enter your name here