Decreto riba principio “no work no pay” a keda cla desde 2016:
ORANJESTAD (AAN) – Manera ta conoci, Dialuna e lesnan na Scol Anochi (Avondberoep Opleiding) a cuminza. Minister di Enseñanza dhr. Rudy Lampe a elabora tocante e tema aki den conferencia di prensa, mas tanto relaciona e discusion cu tin door di algun ex-docente cu a duna di conoce na prensa, cu nan no a wordo yama pa duna les.
E mandatario ta refuta esaki. El a acentua cu e maestronan si a wordo invita, y cu e tin hasta wsp di e persona cu a atende prensa siman pasa, y incluso diferente dialogo a tuma lugar cu nan. Minister Lampe a subraya cu tin e wsp unda e docente concerni a expresa cu nan no ta bay duna les, a base di e principio di “no work no pay”.
E minister a señala cu ya for di 2016, e preparacionnan a wordo haci riba e principio di “no work no pay”, pasobra tabata tin un absentismo halto.
E docentenan no tabata presenta na duna les, y e studiantenan a keda warda y pesey, for di e gobierno anterior caba a señala esey, y e decreto ministerial tabata cla firma y publica, pero e tabata aña di eleccion y pesey e no a tuma lugar.
Minister Lampe a reitera cu e docentenan aki a wordo invita pa un dialogo door cu esey no ta nan trabao fiho. Nan trabao fiho, nan salario, ta mainta unda nan ta duna les na EPB of otro scol. Of esnan cu ta pensionado, e pension ta nan salario.
Minister Lampe a subraya cu les anochi ta un extra molester pa nan, y esey kiermen cu ta nan libertad si nan kier haci un extra esfuerzo pa bin duna les anochi, y cu gobierno aki ta bay over na e conseho cu a wordo duna door di e gobierno anterior caba, pa e ora bay na e principio di no work no pay, pasobra no ta un relacion laboral tin. Esaki ta mainta, of nan ta pensionado, e mandatario a bolbe menciona.
Como cu nan a bisa cu nan no ta duna les a base di principio menciona, desde September ultimo gobierno mester a busca otro docentenan, y segun Minister Lampe e docentenan aki ta pas den e innovacion cu ta tumando lugar den e Avondberoeps Opleiding.
El a splica cu nan ta hopi mas practico y mas liga na e mercado laboral. Sector priva a señala na e minister cu tin un gap entre e mercado laboral y loke gobierno ta ofrece na cursonan.
Pesey gobierno a ofrece profesionalnan cu ta traha den sector priva pa nan bin duna les. Berdad ta asina cu hopi di nan no a siña pa ta maestro, pero a base di nan experiencia den nan trabao. E dignatario a subraya cu esaki ta un scol di ofishi pa adulto, cu ta completamente diferente cu ora ta traha di les pa muchanan den dia.
E docentenan nobo a acepta pa duna les bao e principio no “work no pay” y esaki a keda concretiza.
