Pa mehora e benta y trece bida bek:
ORANJESTAD (AAN) – Recientemente, Minister Presidente a tuma contacto cu e grupo AREA, cu e mes a institui, pa atende cu e situacion di centro di ciudad, vooral Caya Betico Croes, cu te ainda practicamente ta bashi.
Den un entrevista cu e mandatario a splica cu e grupo a bin cu un presentacion tocante kico tur nan ta haciendo riba un escala y a duna detaye di e contacto cu nan tin directamente comerciantenan, y kico e por spera pa resto di aña, cu ta suppose cu e temporada cu ta bin ta esun mas druk cu e resto di aña.
E mandatario a señala cu e kier mira den kico gobierno por yuda pa den resto di aña e comerciantenan por tin un mihor benta.
E dignatario a indica cu e no a haya un update ainda pero e ta keda pendiente di esey. No obstante tin hopi trabao cu ta wordo haci, vooral awo cu e plannan cu gobierno tin ta haci Caya Betico Croes, un centro di “food & beverage”. Gobierno ta trahando riba e toldonan cu mester wordo poni pa crea mas espacio unda hende por sinta come y bebe algo, y cu por atrae e publico pa bin atardi y anochi tambe, den Caya.
E mandatario a subraya cu esaki lo trece bida na e ciudad.
Encuanto San Nicolas, Prome Minister ta indica cu San Nicolas Business Association, ta dunando un empuhe pa genera confianza y speranza. Na San Nicolas tin otro trayectoria ta andando.
Despues di e vacacion escolar di October awo, cu algun minister a bay afo cu nan famia, ta bay yama na un reunion di Conseho di Minister na San Nicolas mes, y lo invita tur e entrepreneurs pa trece dilanti nan ideanan, manera ora nan tabata tin encuentro cu SNBA, pa asina Conseho di Minister scucha nan y mira kico nan por haci como gobierno, pa nan proposicionnan bira realidad.
E dignatario a splica cu mester trece un desaroyo den y pa San Nicolas. El a reitera cu hopi di e ciudadanonan di San Nicolas tin cu lanta tempran pa bin traha na Oranjestad y ta yega nan cas laat y cansa ya cu tin biaha ta tuma nan hasta 4 ora pa yega cas.
Dia cu e entrepreneurs a presenta nan ideanan dilanti SNAB, esakinan tabata tremendo. Prome Minister a señala esaki y a bisa si alomenos 10% di nan ideanan wordo realiza e lo trece un adelanto grandi pa e distrito pa Aruba tambe.
