Home Enseñanza Ningun docente di OAA a wordo yama pa bay duna les awe...

Ningun docente di OAA a wordo yama pa bay duna les awe cu scol anochi ta cuminza

580
0
SHARE
- Advertisement -

Docente Juan Rasmijn:

*Minister lo pone hende di sector priva duna les

ORANJESTAD (AAN) – Docente di OAA (Openbare Avondleergangen Aruba) Juan Rasmijn a duna e siguiente declaracion.

“Mi ta docente na EPB Oranjestad y tambe na OAA anochi, y nos por a tuma nota na prensa y tambe via studiantenan cu awe, Dialuna 14 di October, ta bay cuminza e OAA, cu supuestamente mester a inicia dia 2 di September.

“Pues, nos ta bay low caba. Mi por compronde cu ta bay cuminza awe pero nos cu ta mas cu 50 docente di OAA, no a wordo yama pa bin duna les awe. Awo, nos pregunta grandi ta, ta ken ta bay duna les anto?”

Meneer Rasmijn a duna di conoce cu nan cu ta e profesionalnan ta wordo poni un banda anto e minister ta bay busca hende di sector priva, cu no tin papel di docente pa duna les.

“Esey tin nos preocupa pasobra nos no sa ken ta bay duna les. Y e problema ta cu awor nan kier hinca     OAA den un fundacion, hunto cu Enseñanza pa Empleo”(EPE).

Kiermen, ley ta wordo duna na EPE, y na EPB Oranjestad. “Nos ta kere cu e Instituto di OAA, cu ta bay haci 65 aña mester ta un instituto cu ta para riba su mes. Pasobra pa 65 aña a demostra cu e por educa hende grandi y muchanan pa por haya un trabao den e mercado laboral y awo diripiente e minister kier hinca OAA den un fundacion” Meneer Rasmijn a señala.

El a comenta cu e ta un fundacion cu a lanta pero cu no ta existi ainda oficialmente.  E docentenan ta haya cu nan mester a wordo informa kico ta bay pasa, pero ni un a ser yama y esey ta keda un pregunta grandi pa e Minister, di con e tin cu bay asina aki.

Den luna di September e docentenan a discuti e asunto aki cu e minister di enseñanza, pasobra un siman prome cu scol a habri nan a wordo informa cu gobierno no ta paga mas ora extra.

Meneer Rasmijn tin 35 aña trahando na OAA         y semper el a cobra “over uuren”, el a indica.

Ta un siman prome cu scol habri nan a wordo informa cu ta “ora los” nan ta wordo paga y esaki ta algo cu e docentenan no por acepta, segun sr. Rasmijn.

El a subraya cu nan a wordo avisa un aña prome, nan por a tene cuenta cune, pero no un siman prome.

“Nos a pidi e minister pa duna nos un fase transitorio di un pa dos aña cu tur hende por prepara y sa kico nan ta bay haci. Pero no di un dia pa otro nan ta wordo bisa. Esey ta inaceptable!” Meneer Rasmijn a subraya.

E consecuencia cu esaki ta trece cune pa e docentenan ta cu nan ta bay hopi atras del salario. Ora tin ora los e kiermen no “work no pay” kiermen si un dia e docente bira malo, of pa un motibo e no por a bin scol, e no ta wordo paga, kiermen eynan ta kita un derecho for di nan, pasobra e “over uuren” ta un derecho cu nan a adkiri durante añanan largo.

Meneer Rasmijn a expresa cu e minister a bisa cu esaki ta un “side job” pa nan, pero esey no ta e caso. Nan ta docente den dia y docente anochi. El a compara esaki cu e trabao di un docter cu e ta haci su trabao den dia y e ta wordo paga y e ta haci su trabao anochi y tambe ta wordo paga.  El a subraya cu e minister tin problema cu e docentenan aki ta gana placa extra y e kiermen cu esey no por sigui.

Pa e studiantenan esaki tambe ta algo cu nan ta lamenta.

Pa e scol aki tin entre 250 pa 300 studiante, y nan a bin dia 2 di September pa haya nan cu e sorpresa cu e scol no a cuminza. Y cu a wordo perhudica, pasobra nan a paga pa bin les pa nan bin tende cu scol no ta bay asina mas.

- Advertisement -

DUNA COMENTARIO

Please enter your comment!
Please enter your name here