Stefano Pellizzari:
ORANJESTAD(AAN): Stefano Pellizzari, Director di Pelca Development Company Diaranzon durante e ceremonia di apertura oficial di Hyatt Place Aruba Airport, a hiba palabra como representante di e compania cu a construi e hotel.
Pellizzari a indica cu for di varios aña Pelca a reconoce e potencial grandi di haci negoshi na Aruba.
“Ora cu e oportunidad a presenta pa desaroya un centro di negoshi, nos a acepta e reto sin duda”.
“Na 2016 a cuminza cu planificacion di e proyecto, mientras cu dia 20 di Januari 2017 a haci e acto protocolario di lanta e prome columna di e edificio”.
“Despues di un tiki mas di 2 aña di trabao di construccion y cumpliendo cu tur e rekisitonan tecnico y estetico, nos a sinti nos sumamente orguyoso cu e resultado”.
“Awe cu e apertura y funcionamento di Hyatt Place, nos ta sigur cu e gran aporte ricibi pa isla di Aruba”.
“Cu presencia di Airport Hotel Business Center y Hyatt Place Aruba Airport, nos ta den un edificio di un arkitectura moderno, unda cu a haci uso tambe di elemento y materialnan novedoso, cu a mantene un conexion cu e isla”.
Esaki segun Pellizzari, kende a indica cu e espacio di 5000 meter cuadra ta inclui un stacionamento pa 400 auto, tiendanan comercial y un area bancario representa pa Caribbean Mercantile Bank.
“Esaki no ta solamente inauguracion di un hotel nobo, sino e ta inicio di un concepto innovado di negoshi na Aruba”, segun e Director di Pelca Development Company.
