Minister di Infrastructura:
ORANJESTAD (AAN): Dialuna Minister di Infrastructura Otmar Oduber a hiba prensa den e parti di Bestuurskantoor cu ta wordo renova, pa duna un splicacion di e ultimo desaroyonan.
“Pa Diabierna awor ta bay entrega e edificio aki, pa loke ta e 3 prome fasenan, mientras cu e di 4 fase ta termina dentro di 3 pa 4 luna”.
“Un periodo basta largo di renovacion cu a tuma lugar, pero nos tur ta orguyoso di e edificio aki, apesar cu na cierto momento a cuestiona hopi cu Gobierno a hinca un suma di mas o menos 7 miyon y mey florin den e edificio aki, cu ta un monumento”.
Esaki segun Oduber kende a sigui bisa cu proximamente tin basta trabao mas cu ta bay tuma lugar, incluyendo pa mantene e tegelnan den nan forma original.
El a indica cu dentro di algun siman e tegelnan lo yega Aruba, pa esakinan wordo poni den entrada di Bestuurskantoor y den e pationan.
“Nos ta bay tin un Bestuurskantoor completamente moderniza y renova, despues cu varios aspecto mester a wordo cambia, incluyendo coriente y e vloernan di entrada di Bestuurskantoor”.
Esaki segun e mandatario, kende ta lamenta cu cierto politiconan tabata y ta critica ainda e trabaonan di renovacion.
