Tur cos ta cla pa Aruba Innovation Week
ORANJESTAD (AAN) – Diamars atardi a tuma lugar na Sun Plaza, un conferencia di prensa den cual a wordo anuncia e Siman di Innovacion, den cual ta introduci pa prome biaha e proyecto “Aruba Immerse”.
Na prome lugar a hiba palabra e director di Futura, Varelie Croes, ken a menciona cu e proyecto aki ta bay tuma lugar di dia 28 di October awo te 1 di November proximo.
Sra. Varelie Croes a expresa cu locual ta bay pasa dia 28 di October ta bay ta algo unico, unda e diferente stakeholders y partners di sector publico, priva y NGO’s, entrepreneurs y inversionistanan ta organizando e siman di innovacion aki.
Conhuntamente nan ta bay presenta un calendario di eventonan cu ta consisti di tayernan di trabao, iniciativanan cu ta pasando rond di nos Isla riba tereno di innovacion y sostenibilidad, pa asina nan trece mas concientizacion encuanto aspectonan importante pa Aruba, y hunto invita comunidad pa bin celebra innovacion cu nan.
Futura, banda di esaki, ta organizando dos evento nobo y un concepto nobo cu nan ta treciendo den Caya Grandi, cual ta e apertura di “Futura Café” cu ta un concepto unico y nobo, unda cu a tuma un edificio bashi den Caya Betico Croes, y converti e den un café, unda personanan por bin hunto y asina colabora riba e temanan di innovacion, discuti puntonan di sostenibilidad, y asina crea y bin cu mas solucionnan pa e diferente retonan cu tin na Aruba.
Sra. Croes a señala cu ta importante pa anota cu Innovation Week ta traha cu e obhetivo di “United Nations Sustainable Development Goals” y asina aki, hunto cu e stakeholders nan kier yuda acelera e Metanan di Desaroyo Sostenible.
Futura Café lo ta habri for di 28 di October unda antes tabata “Access Art Gallery” y tur hende por uza e lugar pa nan proyectonan. Ta bay tin diferente sala di reunion cu Futura a set up, cu por reserva pa organiza tayernan di trabao y sesionnan pa e proximo dos luna.
E espacio aki ta bay keda pa dos luna. Banda di Futura Café tambe tin otro lugar cu tabata bashi, unda ta bin “Spaces” cu tambe ta un concepto unico di “Immerse experience” unda henter comunidad por bin y wak e diferente sparkles den e espacio aki, y e intencion ta pa crea mas concientizacion riba tema y causanan importante, cu nan ta kere den dje.
Tristan Every, presidente y co-fundador di ATEC Foundation, a expresa cu ATEC tambe ta contento di forma parti di Immerse Innovation Week, di cual tur esnan presente den e rueda di prensa, a papia for di hopi aña pasa caba, y cu awor nan por mira cu ta birando realidad. ATEC su di cinco edicion lo ta dia 30 y 31 di October y nan ta contento di a yega asina leu, danki na tur e partnernan cu tey for di cuminzamento.
Ryan Peterson Division Manager di Banco Central, a expresa cu 2019 ta un primicia pa Aruba despues cu pa 4 aña largo, diferente organizacion a realiza diferente evento di innovacion y tecnologia y e ta un primicia pa Aruba cu e siman aki lo enfoca hunto, diferente tema cu perspectivanan distinto, cu tin di haber cu innovacion y tecnologia, no solamente pa companianan pero tambe pa hubentud y comunidad en general, y empresanan cu tin di haber cu ambos aspecto.
Pa Banco Central ta un honor y placer di forma parti den e siman aki. Futura y ATEC lo enfoca riba economia circular, kico esaki ta nifica y Banco Central lo elabora riba cambionan climatologico y kico esaki ta nifica pa un isla chikito cu ta depende di turismo, y tambe pa Aruba su infrastructura y su futuro.
Y mas importante nan lo papia riba consumo responsable y produccion sostenible, specificamente e metanan di desaroyo sostenible unda diferente orado internacional y local lo elabora riba nan experencianan y duna conseho con pa mehora e economia circular di Aruba, usando tecnologianan nobo, sin lubida e consumidor.
