ORANJESTAD (AAN) – Den conferencia di prensa di fraccion di MEP, Parlamentario Endy Croes a elabora tocante e ley di Serlimar.
El a bisa cu e ley aki ta data di aña 2005 cual ta den inicio di un proceso di modificacion y structuracion, cu ta garantiza cu e ta bay genera fondo cu lo wordo destina pa cera e dump di Parkietenbos y traha un sanitary landfill nobo.
Endy Croes a indica cu tabata tin un debate y cierto preocupacion den pueblo, pero e ta contento di a mira un tribuna completamente yen, unda cu empleadonan di Serlimar y di Ecotech a forma parti di e debate.
Tabata presente 20 parlamentario cu ta hopi bon, pasobra mas tanto ora tin tratamento di presupuesto tanto parlamentario ta presenta.
Di tur e fraccionnan nan a debati y a lanza un cantidad di pregunta y na final di e prome ronda, casi 14 ora despues di oranan di anochi, a duna contesta na diferente punto di preocupacion.
Parlamentario Croes a subraya cu e hecho no tabata e incinerator sino e ley mes cu den dje algun punto a causa preocupacion y prome cu e sesion e parlamentarionan a sinta cu varios instancia manera ATA, AHATA, Camara di Comercio, Stichting Simeon Antonio, Comision di bisiñanan di Parkietnbos, y mas stakeholders cu a mustra nan preocupacion.
Parlamento di su banda a haci su huiswerk, Endy Croes a señala, y a indica cu tin un rapport di PAHO na mesa, cu ta data di Maart 2018 di cual el a lesa un parti di e conclusion.
PAHO a bisa cu loke ta tumando lugar e momento ey na Parkietenbos no por sigui, pasobra e ta crea malesa pa e trahadornan cu ta bezig eyriba, y cu tin un serie di malesa cu esnan cu ta traha riba e dump por haya.
PAHO, y henter e stakeholders y tambe e pueblo di Aruba ta di coincidi cu mester yega na un solucion, segun e parlamentario sr. Endy Croes.
Ademas, den e programa di gobernacion ta stipula cu lo yega un solucion pa e dump di Parkietenbos.
E minister a bin cu algun nota di cambio mientras cu Parlamento a traha amienda riba algun punto di preocupacion.
Croes a subraya cu parlamento lo keda anda cu e ley aki di e miho manera posible, y ya caba Minister a duna aclaracion riba preocupacionnan cu a bin tanto for di coalicion como oposicion, y e ta kere cu hunto lo ta yegando na un concepto pa den futuro cercano, ora cu e ley pasa ora e sesion continua diamars 15 di October cu e di dos tanda y e votacion den oranan di anochi, e por garantiza cu hunto lo yega na e solucion y asina cumpli cu e anhelo di henter comunidad y primordialmente pa e habitantenan di Simeon Antonio, cu pa añanan largo a biba cu e situacion aki.
