Directora di Reclassering:
ORANJESTAD (AAN): Kico ta hibando e hobennan di edad jong na comete delitonan mas serio. Ariba esaki, directora di Stichting Reclassering en Jeugdbescherming, Seraida Leonard, a laga sa cu ora cu nan bay bishita e menor di edad na warda di polis, nan ta haci un investigacion y locual a resalta aña pasa ta cu tin tres ‘triggers’.
Bao di e hobennan di 17 aña bao abao, e ‘triggers’ ta ‘peer pressure’, amigo y e mentalidad di e hoben. Reclassering no a saca afo cu ta finanzas of problemanan na cas.
Mas tanto ta riparando cu ta e amistadnan cu e hobennan ta deal cun’e, esey ta e ‘triggers’ y esey ta conduci cu e hobennan ta haya nan mes den problema, Leonard a remarca.
Mayoria di biaha e hobennan ta coincidi cu otro hobennan di nan mesun edad. No pasobra e amigo a comete un crimen nan ta hacie, pero ora nan ta den e grupo negativo nan tim e tendencia di comporta den un forma negativo tambe, a subraya.
Hopi biaha mester filtra cu ken e hobennan ta andando, con nan ta ‘hang-out’. Di otro banda, Reclassering ta saca factornan manera e circumstancianan di bida di e hoben cu por conduci cu nan ta cay cera.
A sali afo cu hopi hoben tin nada di haci despues di scol y si pone e combinacion di nada di haci y amigonan negativo, nan ta bay haya nan mes den problema, e experto a duna di conoce. E escogencia di e diferente delitonan ta depende di e ambiente of e grupo cu e hoben ta andando aden, a agrega.
Reclassering semper ta acerca e mayornan ora ta trata casonan di muchanan menor di edad. Hopi biaha ta wak cu e famianan ta disfuncional. Hopi biaha e hobennan ta na cas nan so. E autoridad di e mayornan no tey mas pa cu e hobennan.
Tin diferente motibo pakico un hoben ta cay cera y ta combinacionnan cu Reclassering ta yama ‘red flags’. Por ehempel, tin un hoben cu ta ‘dropout’, cu no tin nada di haci, e ta uzando droga, tin amigonan negativo. Tur e combinacion ey ta haci cu ta un risico halto cu e por comete un delito y cay cera, Leonard a señala.
