Home Hudicial PG a exigi 25 aña di prison pa Chines complice di asalto...

PG a exigi 25 aña di prison pa Chines complice di asalto fatal riba su tanta na Wayaca

541
0
SHARE
- Advertisement -

Acusado a apela e sentencia di 20 aña di prison

ORANJESTAD (AAN) – Recien Corte Superior a trata e apelacion di e Chines P.F. contra su sentencia di 20 aña di prison. Ta asina cu aña pasa na Augustus 2018 e caso a keda posponi y recien e tratamento a tuma lugar.

PG A AUMENTA E CASTIGO

DIARIO a publica anterior cu P.F. a apela e sentencia pasobra e ta haya cu e no ta complice. Sinembargo Hues ta haya tanto P.F. como e Boneriano J.P.E. culpable y a condena nan dos na 20 aña di prison.

Hopi biaha den casonan di apelacion di casonan serio asina, por spera cu Procurador General (PG) ta aumenta e castigo. Den pasado Hof a hala atencion di Ministerio Publico y Corte di Husticia cu mester aumenta castigo pa casonan di atraco arma, asalto arma, asesinato. Esey a haci cu tanto Ministerio Publico como Corte di Husticia di Aruba ta atene nan mes na sentencianan duna pa Corte Superior.

Tratamento di e caso tabata basta largo caminda tabatin discusion entre PG y abogado mr. Momahed riba e culpabilidad di P.F. PG ta haya P.F. culpable, mescos cu Hues di Corte den Promer Instancia pero ta haya cu e castigo di 20 aña di prison ta mucho abao y a exigi pa Hof condena P.F. na 25 aña di prison.

Awor Hof a bay studia e caso y dentro di algun siman lo por spera sentencia.

Dialuna awor 20 di Augustus 2018, e Chines P.F. ta presenta den Corte Superior pa su apelacion contra su sentencia di 20 aña di prison.

DIARIO por a compronde cu e Boneriano J.P.E. no a apela e sentencia. 

HUES TA HAYA TUR DOS COMPLICE

Dia 10 di Mei 2018, den su sentencia di Corte den Promer Instancia, Hues a bisa cu e ta haya legalmente proba cu J.P.E. y P.F. ta complice di e asalto arma riba 13 September 2016, caminda J.P.E. a tira mata e dama Chines Shasha y a tira tambe e casa, kende a keda herida.

Hues a bisa cu no tin ningun motibo pa duda riba declaracion di e Boneriano J.P.E. y cu e declaracion ta wordo carga cu pruebanan tecnico. Hues a mustra riba yamadanan telefonico cu a scucha y otro pruebanan. Hues a conclui cu nan dos a planea e asalto.

Hues a bisa cu for di e investigacion ta sali na cla cu J.P.E. a drenta e cas cu arma den man. Na dado momento el a dal e casa cu e cabo di pistol pasobra e casa no kier a drumi plaat riba vloer. Despues J.P.E. a tie rap nan. El a bay cu Shasha den camber y a puntra pa placa. Shasha a mustr’e riba dos tas. Na dado momento e yiu homber di Shasha a drenta cas. Ora el a mira J.P.E. cu e arma, el a core sali. J.P.E. a bay su tras. E casa a logra los y dal J.P.E. cu stoel di bar.

E momento ey, J.P.E. a tira e casa. Door cu e porta di cas tabata sera, el a tira riba e glas di porta di e cas caminda e victima Shasha tabata para. El a bay habri e porta y mira e casa y Shasha ariba suela tur na sanger. El a coy e tas y yabi di auto y bay. El a yama P.F. y bis’e cu cos a bay malo. A palabra cu e ta bay veld di Sportboy’s, caminda P.F. a bay busk’e cu su yiunan den auto y hib’e cas. Despues P.F. a bay busca J.P.E. bek. Nan a bay na un mondi na Palo Marga caminda J.P.E. a kima e pañanan cu el a usa.

NO TA TIRA ACCIDENTAL

Hues ta haya cu tabatin cooperacion estrecho di asalto arma. Na opinion di Hues, aunke P.F. no tabata presente, e ta responsabel pa e asalto. P.F. tabata sa cu J.P.E. tabatin e arma cu bala. Hues ta haya cu P.F. ta complice di e tiramento. El a rechaza defensa di abogado di J.P.E., cu e tiro tabata accidental. Hues a mustra cu ora J.P.E. a tira, el a tuma riesgo cu por a mata. El a remarca cu J.P.E. no ta un experto den tiramento.

NO TA KERE CHINES

Hues a mustra cu abogado di P.F. a bisa cu ta berdad cu P.F. a huur auto pa J.P.E. Ta berdad cu el a busca J.P.E. y cu a bay Palo Marga pa kima paña. Pero P.F. no a haci e plan di asalto arma riba su tanta. El a sinti su mes amenaza pesey e no a bisa nada na Recherche. Hues a bisa cu e no ta kere eseynan.

Hues a remarca cu ta P.F. mes a hiba J.P.E. na e cas. Ademas ora el a bay busca J.P.E. na veld di Sportboy’s el a mira cu su carson tabata sushi. Hues ta haya cu P.F. no a duna un splicacion acceptable, pakico e no a bisa Polis nada. Hues a mustra cu J.P.E. no a menaza P.F. cu arma. Ora a bay kima e pañanan na Palo Marga, e arma a keda den auto.

Pakico P.F., e momento ey no a bay hiba esaki na Polis. Hues a remarca tambe cu ora cu J.P.E. a keda deteni, ainda P.F. no kier a bisa nada. Por ultimo a scucha nan papia den e bus di detenidonan. A pone aparato pa scucha nan kico nan lo papia cu otro. Na opinion di Hues, si scucha e combersacion no por conclui ningun rato cu P.F. tabatin miedo of tabata sinti su mes amenaza.

Hues a mustra cu P.F. a bisa J.P.E. den e bus, bo sa pakico nan a gara nos. Pasobra hende a mira e auto. Tambe a papia kico a bay cun’e. P.F. a hasta bisa J.P.E. cu su declaracion tin’e frega. Hues a mustra cu P.F. a conseha J.P.E. pa actua cu e ta loco pa e haya menos castigo. Tur esaki ta mustra cu P.F. tabata sa masha bon di loke a pasa.

Hues a condena J.P.E. y P.F. na 20 aña di prison, kitando e tempo cu nan ta sera den KIA. E auto lo keda confisca.

Awor PG, den e apelacion di P.F. contra e sentencia di 20 aña, a exigi pa subi e castigo na 25 aña di prison. DIARIO lo keda pendiente pa sa ki dia e sentencia ta tuma lugar y pa informa comunidad.

- Advertisement -

DUNA COMENTARIO

Please enter your comment!
Please enter your name here