Home Parlamento POR a dicidi di bin cu e iniciativa di ley pa introduci...

POR a dicidi di bin cu e iniciativa di ley pa introduci castigonan minimo

373
0
SHARE
- Advertisement -

Marisol Lopez-Tromp: Cu un castigo minimo di 4 aña

ORANJESTAD (AAN):  Parlamentario di Fraccion di POR, Marisol Lopez-Tromp a indica cu Parlamento, den pasado, den casonan di delitonan moral manera casonan di muchanan cu ta wordo maltrata, abusa, viola, neglisha, etc, ta casonan cu semper cada tanto tempo ta pidi Parlamento pa aumenta e castigonan.

E parlamentario a sigui splica cu den tur e añanan cu a pasa e castigonan a wordo hisa, adapta na loke comunidad ta pidi of exigi.

Di otro banda, ora algo sosode, cu ta wordo entrega keho y cu ta wordo comproba e delito y cu hende ta bay cera unda tin castigonan, no ta parlamento ta haci esaki ni minister. E ta cay bao di Corte y esnan cu ta haci investigacion di parti di husticia ta determina esaki, a indica.

Por ehempel, den un caso di violacion, ta wak den articulonan di Codigo Penal cu ta poni cu si un hende a wordo abusa of viola y ta trata di un mucha cu ta den edad di 12 aña. Ta poni un straf di maximo 12 aña of un boet di cen.

E straf den prison di maximo 12 aña ta duna un huez e libertad pa dicta su sentencia entre 0 aña cu 12 aña.

Den practica, nunca e straf ta yega 12 aña of e ta bao di esey. E hende no ta keda contento. Famia ta keda hopi rabia, a remarca.

“Loke nos den parlamento, como Fraccion di POR a haci pa cu esaki, nos a entrega un iniciativa di ley y esaki ta entrega for di Mei 2018 y nos a traha riba dje, mi colega Howell y mi persona, teniendo cuenta e caso akinan cu loke cu comunidad ta sinti y muy en particular den casonan pisa. Casonan di delitonan moral pisa. Por ehempel, casonan caminda cu hendenan ta bisa cu strafnan te cu awendia no ta wordo aplica manera cu nos tabata desea of kier mira esnan cu a comete e actonan mas largo cera, por ehempel”, Lopez-Tromp a splica.

Den e caso aki POR a dicidi di bin cu e iniciativa di ley pa introduci castigonan minimo. Esaki ta nifica cu den practica, POR ta propone lo siguiente. Pa huez, en bes di entre 0 pa 12 aña, den su autoridad pa determina un castigo, en bes di tin esaki, POR ta pidi pa e straf ta minimal 4 aña pariba.

No kier duna e huez e espacio mas di duna 0 aña, un aña, dos aña, tres aña. POR kier pa e castigo cuminza na 4 aña bay ariba. Eynan e discusion ta bin den e sistema hulandes cu tin pa cu leynan.

Por ta den e sistema hulandes no tin e castigo minimo, pero tin hopi pais na mundo cu a aplica esaki, incluyendo paisnan grandi. Nan a experencia kico ta nifica cu ni mas cu parlamento hisa e castigonan cu hueznan den nan pais no ta aplica esaki tur ora y ta duna castigonan relativamente abao, a subraya.

Marisol Lopez-Tromp a sigui bisa cu comunidad no ta reconoce mas su mes den e sentencianan aki. Comunidad ta rabia y nan ta sinti ofendi, tristo, traumatiza, rabia, cu sentimentonan cu nan no ta compronde mas.

- Advertisement -

DUNA COMENTARIO

Please enter your comment!
Please enter your name here