Home Parlamento Presidente di Staten a bolbe relata kico a origina e problema financiero...

Presidente di Staten a bolbe relata kico a origina e problema financiero di Aruba

106
0
SHARE
- Advertisement -

Ademas di e motibo pa lanta e Social Crisis Plan:

ORANJESTAD (AAN) – E Colegio di Supervision Financiero (CAft) a reuni den Parlamento, pero den cuadro di e Comision Permanente di Finanzas y Economia. Asina mr. Ady Thijsen, Presidente di Staten, a splica den un entrevista cu DIARIO.

Presidente di Staten a bolbe duna un relato tocante con e situacion di e problemanan financiero di Aruba a surgi, y ki rol CAft mes y gobierno di Hulanda a hunga den esaki, y pakico mester a lanta un fondo di Social Crisis Plan, y tur cos pa falta di nan supervision riba e gobierno anterior.

E Comision aki ta wordo presidi pa Parlamentario, sera. Daphne Lejuez. Thijsen mes no tabata presente, pero a base di e rueda di prensa cu nan a tene, el a splica cu ta mustra remarcable cu CAft ta sigui cana e caminda, siendo cu e Laft di 2015 no tey mas.

E parlamentario a reitera cu parlamento a cambia e Laft door di un amienda, y aproba e ley y tin un reunion cu mester bin ainda.

Presidente di Staten a sigui splica cu Parlamento a scucha CAft y el a indica cu ta bon pa tur hende sa cu pa loke ta trata Laft y e situacion financiero di Aruba, tin hopi informacion incorecto cu ta core rond, y tin hopi manipulacion riba esaki tambe. El a subraya cu ta informacion a base di “fakes”.

Presidente di Staten mr. Thijsen a expresa cu mester pone e cosas bon cla. CAft ta un organo di conseho, pa Conseho di Minister di Reino. Esey ta nan funcion.

“Nos ta Parlamento di Aruba, den un Estado di Derecho y nos tin nos Gobierno, etc. Laga nos ta claro cu otro, nan ta conseheronan. Nos den e cambio di ley cu nos a haci nos a bisa cu nan mag di keda, anto duna nos e conseho. Pero nos (parlamento) ta e organo superior di un pais den un Estado di Derecho”, mr. Thijsen a subraya.

Presidente di Staten a subraya cu den nan conseho pa aanwijzing e no sa den kico nan ta basa nan mes, pasobra nan no tin base legal y esey ta algo cu nan mes a admiti.

Segun mr. Thijsen, nan ta bisa cu tin diferencia di opinion, no di awo, pero nan no tin base pe y segun informacion cu e parlamentario tin Conseho di Minister di Hulanda mes ta acepta cu e interpretacion, pa loke ta trata e Social Crisis Plan cu e ta hinca den e 479 miyon di presupuesto, no ta corecto.

El a reitera cu Parlamento ta esun cu a bin cu e ley di Social Crisis Plan y a aproba esaki, pa duna e minister di asunto social y labor sosten, cu un fondo, pa tur e problemanan social cu tin.

El a bolbe bisa cu tur e fondonan cu tin na Aruba ta apart di e presupuesto. Un interpretacion anto, cu mr. Thijsen no sa di unda CAft a sake, “pero e ta keda na nan…” el a expresa.

Presidente di Staten a subraya cu Parlamento y Gobierno a tuma un bon decision y nan ta canando e bon caminda. E cifranan y e situacion ta mustra con esaki ta bayendo. E meta ta pa Aruba ta economicamente y socialmente bon, y den e cuadro aki nan ta bay.

Segun mr. Thijsen CAft como un organo cu ta duna conseho mester compronde y wak pa nan sigui duna conseho y tene cuenta cu e realidad di bida cu Aruba ta biba cune.

CAft ta cuestiona e aspecto di personal den e Social Crisis Plan, unda mester a tuma hende temporalmente pero esaki ta apart, pues no por bay conte aden. Eynan Presidente di Parlamento ta haya cu CAft ta inhusto.

Esaki pasobra ora nan mester a supervisa nan no a hacie, na 2014 te 2017 nan a laga cosnan pasa y eynan e problema grandi di Aruba a surgi.

Esaki no ta bay pa cifra so, pero financieramente e debe a bira mas grandi, economicamente e pais a stanca, y e problema mas grandi ta cu e problemanan social a aumenta, y esey gobierno a confronta su mes na final di 2017 inicio di 2018, y e ora ey mester a solucione y atende cune.

E parlamentario a enfatiza cu si Hulanda y e supervision financiero a haci su trabao bon, no tabata tin e problema aki y kizas no tabata tin necesidad di e fondo di crisis social.

- Advertisement -

DUNA COMENTARIO

Please enter your comment!
Please enter your name here