Inversion di algo mas cu 7 miyon pa restaura monumento
ORANJESTAD (AAN): Bestuurskantoor ta kedando cla cu su proceso di renobacion.
Mester corda cu e edificio aki ta uno cu ta forma parti di e monumentonan cu tin na Aruba y recientemente Gobierno a cuminza cu un proceso pa restaura e edificio.
Awor ta asina leu cu a finaliza e prome di e tres fasenan di e proceso aki. Minister Otmar Oduber a duna di conoce diaranzon atardi cu esaki ta un momento historico y a celebra esaki hunto cu Prome Minister Evelyn Wever-Croes, coleganan, miembronan di parlamento, personal di DOW y DTI, Monumenten Bureau y e compania encarga cu e trabao, esta Van Kessel.
Esaki ta un proyecto cu desde un inicio tabata sa cu ta grandi pero no a pensa cu e lo a bira asina grandi na caminda mirando e estado cu Bestuurskantoor tabata den dje, Oduber a indica.
A agrega cu mas di e inversion cu a tuma lugar den e edificio aki, cual ta un inversion di algo mas cu 7 miyon florin, tabata un inversion den e aspecto cu ta trata herencia, historia y pa loke Aruba a para pe.
Gobierno a tuma e decision pa restaura e edificio di Bestuurskantoor y tuma e aspecto di loke tabata monumental. A percura pa tur loke ta trata e fachada haya e origen di loke tabata e edificio den 1942 cu esaki a wordo construi, Minister Oduber a indica.
E mandatario hunto cu Prome Minister Wever Croes, a firma e diferente decretonan pa por ricibi e yabinan di Bestuurskantoor bek. El a gradici Sr. Van Kessel pa e trabao haci.
E otro fasenan di e renobacion lo keda cla na December benidero y pa di e forma ey gobierno por cuminza opera bek na un forma normal den e edificio.
Premier Wever – Croes di su parti a gradici tur esnan cu a haci e restauracion di e monumento uno posibel.
Den e oficina unda e mandatarionan tabata sinta, a bisa, ta tipifica e historia democratico di Aruba. “Esaki ta e caminda cu decisionnan grandi a wordo tuma cu awe nos ta para ariba nos propio pia como pais”, Prome Minister a remarca.
El agrega cu ora cu Gabinete Wever – Croes a sinta na 2017 nan a hay’e hopi bandona. Den hopi mal estado, pero no a bira lomba y a bisa cu esaki ta e centro di decisionnan y e lo bira e centro di decisionnan bek y lo bay restaur’e den su gloria original pa por lagu’e pa futuro generacionnan.
