ORANJESTAD (AAN) – E siman aki, ta e prome siman di Innovacion cu ta wordo desaroya na Aruba. Den conferencia di prensa, Minister Presidente Evelyn Wever- Croes, a elabora tocante e evento aki tambe.
Prome Minister a subraya cu e siman aki cu hopi entusiasmo y dinamismo mas cu 25 instancia a team up hunto cu Futura cu ta e entidad encarga cu Innovacion, pa asina trece un calendario cu diferente actividad rond di Aruba, cu tin di haber cu innovacion, sostenibilidad, y creatividad.
E dignatario a subraya cu a scoge e siman aki pa asina trece comunidad hunto, pa comparti ideanan y solucionnan specialmente den e cuadro di e Metanan di Desaroyo Sostenible 2030 cu Nacionnan Uni a decreta.
Prome Minister a menciona cu un di e proyectonan cu ta hopi cerca di su curazon ta Super Nova cu ta un proyecto cu ta bay enfoca riba nos muchanan den e materianan tecnico: Ciencia, Ingenieria, Tecnologia y Matematica.
E mandatario a reitera cu varios scol a wordo invita pa e muchanan muher participa, y intercambia cu otro hendenan muher exitoso den e areanan di STEM.
E mandatario ta spera cu asina e muchanan por wordo inspira pa nan por sigui den e materianan aki.
Otro proyecto ta Futura Café cu ta bay habri su porta pa publico, Diaranzon di e siman aki. E ta un Pop op café, kiermen e no ta permanente pero ta djis pa e siman aki. Despues Futura ta bay bek unda cu nan ta ubica.
Nan ta bay haci uso di un edificio bashi den Caya Betico Croes, y el a wordo transforma den un café hopi innovativo y interactive. E mandatario ta extende un invitacion pa henter comunidad, pa bay mira con un edificio cu tabata pa hopi tempo bashi, por wordo transforma den algo hopi innovativo, creativo y agradable.
E intencion di Futura café ta pa ofrece sala di reunion ekipa cu tur lo necesario pa por efectua un bon reunion, productivo, innovativo.
Tambe ta bay tin diferente tayer di trabao e siman aki den e mesun lugar, y tambe lo wordo uza como salanan di estudio pa studiantenan di Universidad, pa asina aki trece bida den Caya Betico Croes.
Esaki no tabata posible si no ta den colaboracion cu diferente otro instancia, y e ta mustra cu trahando hunto por logra cosnan grandi.
E aspecto aki di Pop-up, Gobierno kier desaroy’e mas biaha pa trece bida den centro di ciudad. E lo duna mas informacion ora cu tin un plan mas integral riba mesa.
E mandatario tambe a haci un invitacion na tur NGO’s, sector priva, stakeholders pa haci uso di e espacionan aki y ta parti di e siman di innovacion.
Ademas tin otro espacio yama Spaces cu tambe lo wordo inaugura e siman aki, y e ta un espacio unda ta bay presenta solucionnan innovativo cu ta tumando lugar na Aruba caba, y cu tambe por bin mira e creatividad cu tin den nos pueblo.
Spaces ta bay keda habri durante e siman di Innovacion aki, y e lo keda habri despues pa dos luna mas pa tur hende por pasa y mira y experiencia algo diferente den Caya Betico Croes. E mandatario ta reitera su invitacion pa henter comunidad pa participa den e siman aki.
Tin un website cu yama immersearuba.org den cual por busca mas informacion tocante kico tin. E actividadnan di Futura ta gratuito, pero tin otro organizacionnan cu ta esnan cu ta organizando varios evento pa cual, posiblemente mester paga of ta bay riba invitacion.
