Home Parlamento Reunion di Ley di Serlimar posponi te Diaranzon pa asina studia documentonan...

Reunion di Ley di Serlimar posponi te Diaranzon pa asina studia documentonan nobo

148
0
SHARE
- Advertisement -

Ady Thijsen cu mensahe tambe pa Booshi Wever

ORANJESTAD (AAN):  Wowo di henter e pais tabata Dialuna dirigi riba Parlamento.  Pero e reunion a wordo para.

Den un entrevista cu Presidente di Parlamento Ady Thijsen, el a splica di con a para e tratamento di e Ley di Serlimar.

Segun Thijsen a tuma e decision aki, y a mustra cu tabatin algun documento cu a yega laat pa e reunion.  E ora e como Presidente di Parlamento a tuma e decision pa pospone e reunion di Dialuna mainta.

Awor e reunion lo sigui riba Diaranzon 2 di October 2019 den oranan di mainta.

Aki ta unda cu Thijsen a bisa, cu e ta cumpli cu e indicacion di algun miembro di Parlamento cu ta desea pa haya mas tempo pa studia e documentonan extra aki.

“Mi ta kere ta na su lugar pa e Parlamentarionan cu ta esnan cu ta tuma e decision, cu si nan mester mas tempo, lo duna nan mas tempo, y esey no ta problema.  Mi ta haya esey algo normal,” Thijsen a bisa.

El a evalua e asunto, y a tuma decision pa cambia e reunion pa Diaranzon.

Presidente di Parlamento a indica cu semper tin di sigui e desaroyonan den comunidad, evalua y analiza tur cos.  Nos ta biba den un pais democratico, y nan mester ta transparente, mester scucha, tende, y tuma decision.

Thijsen a subraya cu den bida tin di tuma decision, y si bo keda sin haci esey, e lo ta algo di mas malo cu bo por haci.  E mes a tuma manifiesto di dos grupo cu a bay tene protesta dilanti Parlamento.  El a haya manifiesto di grupo di trahadornan di Serlimar, y a haya manifiesto tambe di trahadornan MetaCorp.

Esey tabata preocupacion di e clase laboral, pero Thijsen sa tambe cu comunidad henter ta bibando cu e asunto aki, y Parlamento tin di tuma esaki hopi na serio.  Pesey tin di dune e mihor trato, y tuma e mihor decision posible.

“Semper bo ta haya hende cu ta pro, y otro cu ta contra.  Con cu bo bire, asina democracia ta draai y nan como Parlamentario tin di tuma decision,” Thijsen a indica.

   ACTITUD DI BOOSHI WEVER:

E President di Parlamento a manda un mensahe tambe na tur hende, politico, y media cu ta ocupa pa instiga y manipula.  El a menciona specialmente ex-Ministro Booshi Wever.

“Booshi Wever tabata hopi aña den politica, e tabata Ministro y e sa con e procesonan aki ta bay, pero ta bin pa insulta hende, tira palabra, instiga y manipula, y mi ta kere cu esey bo no ta gana nada cune,” Thijsen a indica.

Ady Thijsen a splica, cu Booshi Wever sa cu tanten bo pone un reunion, ta hopi cos por pasa!  Bo por schors e reunion durante e tratamento.  Bo por sigui cu e reunion, pero bin cu cambio manera amienda.  Bo por cambia ley asina!

E ta haya cu pa Booshi Wever bin instiga cu palabra di ‘stempelparlement’ y cu presidente di Parlamento ta ‘yo-yo’, etc.  “Esey ta mustra bo nivel cu bo ta hiba politica, y pesey mi ta kere tambe pakico nan no kier e mas den Parlamento’.

E sa cu Wever tin libertad di expresion, y mag di hacie.  Pero e regla general ta cu Aruba no ta den momento aworaki pa por instiga, dividi, y segrega pueblo, poniendo grupo contra otro.  E isla ta den momento dificil y segun Thijsen, e momentonan a yega pa tuma decisionnan serio.  Esey ta loke Parlamento lo bay haci.  E President di Parlamento a mustra cu e lo carga responsabilidad pa su decisionnan.  Pesey el a dicidi pa pospone e reunion, pasobra e ta kere cu ta na su lugar pa duna mas tempo pa studia e documentonan aki.

- Advertisement -

DUNA COMENTARIO

Please enter your comment!
Please enter your name here