SADA na caminda pa hiba gobierno Corte

    596
    0
    SHARE
    - Advertisement -

    Debi cu no a cumpli cu e convenio:

    ORANJESTAD (AAN) — Despues cu dia 11 di September ultimo Cuerpo di Douane tabata tin un accion masal, relaciona cu un convenio relaciona cu nan posicion salarial, cu a wordo firma na 2017, y cu gobierno a priminti cu nan ta bay cumpli y a pidi SADA pa duna nan un tiki tempo pa nan keda cla cu tur e proceso huridico.

    Pa sorpresa di SADA, segun sr. Edward Maduro a declara den un entrevista cu DIARIO, dia 9 di September gobierno a informa nan cu no ta bay cumpli cu e ‘covenant’, pasobra diripiente a bin un par di conseho negativo di DRH (Departamento Relacionnan Humano), y pasobra gobierno mes ta haya cu esaki por crea un precedente.

    E lider sindical a subraya cu e covenant aki a wordo firma na 2017 pa e mesun personanan di DRH. Su pregunta ta kico ta pone cu DRH diripiente ta cambia of ta depende di ken ta den gobernacion?

    Edward Maduro a comenta cu for di inicio di 2018 SADA a manda carta pa gobierno pa puntra con ta para cu e situacion di covenant. El a trece dilanti bek e accion di 11 di September ultimo, unda Gobierno a entama un caso den Corte contra e sindicato, y un dia despues gobierno a duna un rueda di prensa den cual a splica cu nan mes lo duna e trahadornan di Douane un presentacion, pasobra nan ta di e pensamento cu kizas SADA ta malinforma su miembronan tocante e situacion.

    Corte a duna 30 dia di “cool of period” y esaki ta yegando su final, Gobierno a dicidi pa manda un invitacion pa Cuerpo di Douane y SADA, pa un presentacion cu nan a tene, pero e asistencia tabata hopi pober, y esaki ta duna un bista cu e trahadornan di Douane no kier tende nada di presentacion ni voorstel nobo, despues cu a bin cu tres propuesta caba.

    Aworaki gobierno kier bin cu un di cuater propuesta y e trahadornan no kier sa nada di otro voorstel pero nan kier sa ki tempo nan ta bay cumpli manera a bin primiti nan pa 22 luna largo.

    SADA a informa gobierno pa instruccion di su miembronan cu nan ta bay cana e caminda di Corte y ta laga Huez dicidi si e covenant di 2017 ta valido of no.

    E convenio aki a wordo firma pa ex-minister Bermudez na prome instancia y gobierno ta un continuidad, di manera cu e gobierno cu ta sinta awo mester cumpli cune.

    Maduro ta corda cu na November 2017 minister di finanzas a yama un rueda di prensa den cual el a declara cu e si ta respeta e covenant aki, cu nan ta bay ehecuta e convenio, y hasta SADA a wordo tilda door di gobierno cu e kier stroba e proceso.

    Pero aworaki e mesun gobierno cu na November 2017 a bisa cu nan ta bay ehecuta e convenio, aworaki ta bisa cu no ta bay ehecute y esaki ta nada agradable pa e miembronan y nan a demostra esaki dia 11 di September.

    Mediador tabata presente durante e presentacion reciente cu gobierno a haci y cu a conta cu minimo interes di e trahadornan, y el a bisa e miembronan cu e mes a acerca Prome Minister, ya cu Huez a bisa den su sentencia ora gobierno a entama caso contra SADA, pa nan sinta na mesa y sali for di e impasse aki.

    Maduro a subraya cu nan a cuminza cana e caminda pa Corte, pero si Gobierno ta yama nan pa sinta na mesa pa purba di yega na un solucion nan ta dispuesto pa haci esaki. Mirando cu tin mas di un sindicato cu tambe ta bay hiba gobierno Corte, SADA ta prepara mentalmente pa warda algun luna mas pa e Caso bin dilanti.

    E sindicalista reitera cu no obstante, si gobierno mustra e boluntad pa sinta na mesa pa dialoga y respeta e covenant, SADA ta willing pa hacie tambe.

    - Advertisement -

    DUNA COMENTARIO

    Please enter your comment!
    Please enter your name here