ORANJESTAD (AAN): Di parti di Women’s Club of Aruba a bin na e idea di un proyecto titula “Ban Planta Hunto” Mesora a pidi e cooperacion di Santa Rosa pa asina mira kico ta e posiblidadnan pa duna un man den e proyecto aki.
Den un reunion hunto cu esnan di Women’s Club of Aruba den persona di señora Bernadette Schouten, señora Francielle Lacle y presidente señora Milagros Posner y di parti Santa Rosa sr. Ludwig Rasmijn a presenta e idea pa asina Santa Rosa mira kico ta e ayudo y experticio di parti Santa Rosa cu nan mester.
Den e presentacion di e proyecto aki tin 4 scol basico cu lo ta participando. E proyecto ta ensera cu e scolnan cu participa cada alumno mester bay planta cu participacion di nan mayor, pero den e caso aki e mama.
Pa bon marcha di e proyecto Santa Rosa mester guia e proceso di plantamento.
A extende un invitacion na esnan di Women’s Club of Aruba pa ta presente na Santa Rosa pa asina hunto haci e proseso di planta e prome simiyanan. E simiyanan aki ta bay keda algun siman te ora cu nan nace. Despues e tarea lo bira di e muchanan pa bay transplanta e esakinan den pochinan mas grandi.
E docentenan tambe lo mester bisihita Santa Rosa den transcurso di simannan nos dilanti pa siña e proceso di transplanta. Despues e docentenan mester haci e proceso hunto cu e muchanan.
Por aprecia riba e potretnan cu ta acompaña e articulo cu tabata presente diferente miembro di Women’s Club of Aruba (WCA) pa efectua e prome palnatamento di simiyanan. Nos colega Ludwig Rasmijn tabata e persona encarga pa guia e proseso di planta e simiyanan.
Sigur tabata un mainta masha ameno na Santa Rosa.
