ORANJESTAD (AAN): Tabata Diabierna anochi, cu Rescue and Coordination Center di Guardacosta, a detecta riba radar cu tin un boto moviendo na parti pazuid di Curacao y cu nan a yega tera.
Mesora RCC a pone Douane di e isla na altura pa duna un man. Tambe a pone e helicopter di Guardacosta move pa e area.
Diripiente riba radar, nan por a mira cu e boto a hala bek for di tera, y a bolbe cuminza move riba lama direccion zuid.
E ora a dicidi na manda un unidad di Metal Shark di Guardacosta pa intercepta e speedboat aki. Nan a haci esey exitosamente y a logra gara e capitan. El a keda deteni.
Mientras tanto riba tera, Douane a logra di captura seis ilegal. Ta trata di 3 homber y 3 muher.
Un di e ilegalnan a revela na autoridad, cu mientras nan tabata abordo di e boto rumbo pa Curacao, cu nan a haya problema cu motor. Aki ta unda cu ambos Outboard Engines a stop di traha. Pero toch e capitan a logra di cende uno di nan bek, y pues cu un velocidad mas lento nan por a sigui move rumbo pa Curacao.
Debi na e problema cu motor aki, en total a dura nan 12 ora prome cu nan a yega e isla. E hendenan aki cu ta haciendo e viahenan peligroso aki pa cruza lama di Venezuela pa Islanan ABC, ta paga centenares di Dollar pa e servicio. E cruzamento ta socede den botonan cu tin biaha no ta ni apto pa ta riba lama, y pa colmo nan ta pone demasiado hende abordo.
Tanto e seis ilegal, y e capitan (siete hende en total) a wordo pasa pa Cuerpo Policial di Curacao pa sigui cu e investigacion.
