ORANJESTAD (AAN) – Shamira Raphaëla a haci un bishita di cortesia Diaranzon 23 di October na Arubahuis riba invitacion di Minister Plenipotenciario Guillfred Besaril.
Shamira recientemente a ricibi un “Gouden Kalf” pa su documentario “Daddy And The Warlord”. E “Gouden Kalf” ta e premiacion di Hulanda pa cinematografia, compara cu e Oscar na Hollywood.
Den e documentario “Daddy And The Warlord’ “periodista Clarice Gargard – hunto cu director di cine Shamira Raphaëla – a cuminsa un busceda riba e cara real di Clarice su tata, cu pa añanan a traha pa e regimen cruel di Charles Taylor, ex presidente di Liberia, Africa.
Minister Besaril a felicita den nomber di Gobierno di Aruba, staf y personal di Arubahuis Shamira cu su premio. ‘Aruba ta hopi orguyoso di bo. Nos ta desea Shamira hopi exito cu su carera den e mundo cinematografico y cu sigur nos por spera hopi produccion bunita dje den futuro,’ asina Minister Besaril a bisa.
Nota pa redacion: E potret ta cortesia di Cas di Aruba
