ORANJESTAD(AAN): ATIA riba 15 di November ta bay tene nan asina yama ‘Annual Corporate Event’.
Relaciona cu esaki tabata tin un conferencia di prensa Diahuebs.
Durante e rueda di prensa, Michelle de Groot directora di ATIA a splica cu ATIA ta sumamente orguyoso di organiza e evento aki pa di 10 aña consecutivo.
“E ta un evento ya caba hopi conoci bao di e comunidad di comercio”.
“E evento aki semper ta brinda e oportunidad pa bo bin scucha un orado sea local of internacional, riba un tema actual”.
“E ta duna un bon oportunidad tambe pa ‘networking’ den un ambiente ameno, cu comerciantenan y otro figuranan prominente di sector priva of publico”.
Esaki segun e director, kende a sigui bisa cu e aña aki e tema ta bay ta ‘Developing Our Human Capital’.
“Como ATIA nos ta scucha hopi for di nos miembronan y e comunidad comercial en general, con dificil e ta pa por haya personal cu e capacidad necesario den e mercado laboral”.
“Esaki ta conta pa tur nivel di trabao den un compania”.
“Nos conoce un desempleo di 7.3% y bao di hobennan e ta 16.2%”, segun de Groot, kende a bisa cu lamentablemente no ta semper bo por haya e persona den e pool aki di esnan desemplea, pa haci e trabao cu bo kier pa wordo haci den bo compania”.
“Employability ta hunga un rol den esaki, unda cu tin cu wak no solamente e atributonan di habilidad, sino tambe atributonan personal”.
Esaki segun de Groot, kende a indica cu papiando cu comercio nan a indica cu locual cu tin riba e mercado laboral no ta cuadra cu locual e companianan tin mester.
El a indica cu ora cu un compania no por haya na Aruba e hendenan cu tin e ‘skills’ necesario, nan tin cu busca den exterior.
“Manera nos tur sa esaki ta un proceso hopi largo y dificil y tin hopi compania cu door di esaki ta dicidi di djis sigui cu nan compania manera nan ta”.
“Pesey e orado cu nos a invita pa nos evento pa Shea Gopaul, kende ta un ‘Special Representative of the International Organization of Employers (IOE) to the U.N.”.
“Gopaul ta e fundador di e organizacion Global Apprenticeship Network y aki ta caminda su experticio riba e tereno aki ta bira uno interesante pa Aruba”.
“Global Apprenticeship Network ta un organizacion cu ta conecta companianan y organizacionnan cu hobennan, pero tambe cu ‘lifelong learners’, pa asina forma un conexion entre educacion y empleo a base di work based learning”, segun de Groot, kende a bisa cu e evento di dia 15 di November ta bay ta di 7’or pa 11’or di anochi na House of Mosaic.
