Home Gobierno “Si bo duna ilegalnan trabao, bo tambe ta participa den traficacion di...

“Si bo duna ilegalnan trabao, bo tambe ta participa den traficacion di hende”

214
0
SHARE
- Advertisement -

Fiscal Rianne Wilderman:

ORANJESTAD  (AAN): Diabierna durante un conferencia di prensa, Minister di Husticia Andin Bikker riba e Dia Internacional di Combatimento y Prevencion di Mundial di Traficacion di persona, a papia di e problematica aki.

“Traficacion di hende ta por ehempel cu personanan ta paga un suma pa na un forma ilegal drenta nos frontera”.

“Tin tambe casonan unda cu hendenan ta haya nan mes casi den un tipo di esclavitud moderno, cu ta castigable”,

Esaki segun Bikker, kende a indica cu Aruba ta parti di esaki a base di tratadonan internacional.

Aruba algun luna pasa den Reino a renova un MoU relaciona cu trafico humano, mientras cu Aruba tin un unidad special cu ta traha contra e problematica.

Bikker a indica cu den cuadro di sosten pa haci e fronteranan mas fuerte, algun siman pasa a destina fondonan adicional pa dedica esaki specificamente na combatimento di traficacion y contrabando di hende.

Fiscal Rianne Wilderman, encarga cu traficacion y contrabando di hende, a hiba palabra tambe Diabierna.

El a splica cu riba  e dia aki ta importante pa señala cu Aruba ta situa mey mey di paisnan cu tin un standard di bida hopi abao.

“E hendenan den e paisnan aki tin mas dificultad pa pone cuminda riba mesa y esey ta pone cu e hendenan ta bay busca nan fortuna na otro pais”.

“Aruba sigur ta un di e destinacionnan popular, pasobra facilmente nan por yega cerca”.

Esaki segun e fiscal, kende a indica cu ultimo tempo bo ta ripara cu mayoria di e hendenan ey ta bin for di Venezuela.

El a splica cu e hendenan ta bin Aruba, pasobra nan ta pensa cu nan por gana mas placa aki.

“Nos investigacion ta mustra cu tin un organizacion criminal tras di e transporte pa Aruba riba boto”.

“Mayoria di e hendenan cu ta bin den direccion di Aruba ta haci esaki via organizacionnan grandi y nan tin cu paga hopi placa pa esaki”.

“Door cu hopi biaha nan ta haci un debe grandi, nan tin cu purba gana e placa aki bek na Aruba”, segun Wilderman.

El a sigui bisa cu na Aruba nan ta tuma cualkier trabao cu nan por haya, pa gana e placa pa paga nan debe bek.

“Si bo duna e hendenan aki trabao, bo ta haya hende pa traha pabo pa tiki placa, pero asina bo ta haci bo mes culpable na trafico di hende”.

“Hopi di e hendenan aki cu ta manda placa pa Venezuela y ta bay bek nan pais, hopi biaha ta bin bek Aruba y ta haya trabao cerca e mesun hendenan cu a yega di duna nan trabao”.

“Tin hende na Aruba cu ta duna e hendenan aki un caminda pa keda, pero mayoria biaha ta hopi hende den tiki espacio”.

“No ta cu nan gusta esaki, pero nan ta haya an mes obliga door di e situacion na nan pais”.

“Esey tambe ta traficacion di hende y nos tin cu habri nos wowo pa esaki tambe y actua”, segun e fiscal.

“Nos no tey ainda, pero nos ta trahando duro riba dje”.

“Nos tin mester tambe di mas opvang por ehempel, pa hendenan cu bira victima di esaki y mester tin mas ‘awareness’”.

“Wak rond di bo y sa ta ken ta bin atende cu bo cura, of construi bo murayanan, pasobra e por ta un hende cu a haya su mes obliga di hinca su mes den e circunstancianan aki”, segun Wilderman.

- Advertisement -

DUNA COMENTARIO

Please enter your comment!
Please enter your name here