Minister Andin Bikker:
ORANJESTAD(AAN): Diahuebs durante su conferencia di prensa, Minister di Husticia Andin Bikker a papia riba e asina yama ‘Caso Speel Tuin’.
Esaki reaccionando riba e hecho cu varios hende den comunidad a keda babuca, rabia y sorprendi pa e hecho cu e mama den e caso aki di e dos criaturanan cu a wordo mata algun aña pasa pa nan padrastro, ta pafo di prison caba.
“E mama di e dos criaturanan cu a fayece entretanto a sinta su castigo”.
“E persona aki a wordo deteni y mantene den detencion desde 24 di November 2017”.
“El a wordo sentencia na un castigo incondicional di 2 aña y 1 aña condicional”.
Esaki segun e mandatario, kende a indica cu na Maart a nenga su libertad condicional y awor cu el a sinta practicamente e castigo di 2 aña, Ministerio Publico a dune libertad condicional, cu e condicion cu e lo sigui bao di tratamento psicologico y bao di guia di Reclassering.
“Ministerio Publico a tuma e decision aki y si tin pregunta riba e asunto aki mester tuma contacto cu OM”, segun Bikker, kende a bisa cu e decisionnan riba libertad condicional ta den man di Ministerio Publico y Centrale Raad voor Reclassering.
“Nan ta dicidi si un preso ta bin na remarke pa libertad condicional, pues e storia cu mi ta tende di cierto medionan opositor di prensa cu ta e minister ta laga hende bay, ta completamente nonsense y un prueba cu cierto medionan no kier conoce nos leynan”, segun e mandatario.
