Sosten total pa informacion DIARIO riba autonomia financiero
*Antia Hulandes hamas lo a permiti garantianan pa hotelnan
*Pueblo di Aruba a carga e riesgonan di proyectonan turismo
ORANJESTAD(AAN)–Sosten total ta loke DIARIO a ricibi di expertonan pa e informacionnan cu el a trece dilanti den su edicion di Diabierna 25 di October 2019.
Informantenan ta para firme den nan posicion cu e daño mas grandi cu Gobierno Mike Eman a causa Aruba ta, cu el a mishi cu e autonomia financiero cu e pais a logra cu Status Aparte.
“Na 1985 Aruba a bira victima di e situacion petrolero internacional y e crisis mundial di petroleo. Na e momento cu Aruba tabata planea su entrada pa Status Aparte, rond mundo refinerianan a cera nan porta,” a wordo indica.
E salida di Lago a wordo uza como un instrumento contra Betico Croes cu a haya un posicion fuerte ora na 1983 el a logra e Status Aparte di Aruba.
Ora e crisis di ceramento di Lago a presenta, Aruba tabata den un dolor grandi y ta den e situacion aki e logro grandi di autonomia a wordo desbarata.
“Ta pa motibo cu Aruba a haya su Status Aparte y tabata tin su propio gobierno, Aruba por a uza turismo pa e crea un economia nobo,” un informante experto den asunto di gobernacion a trece dilanti.
E autonomia di Aruba como pais den Reino a permiti pa e prome gobierno di e pais nobo Aruba, a uza turismo pa rescata economia.
E rescate aki a tuma a base di garantianan cu e prome gobierno di Aruba a duna pa hotelnan habri na Aruba. Pues ta e pueblo di Aruba tabata responsabel pa e resultado financiero cu e proyectonan lo tabata tin pa futuro di e pais.
A wordo afirma na DIARIO cu e maneho aki tabata tin riesgonan grandi, cu hamas Antia Hulandes lo a acepta pa carga.
Pues di na 1986 Aruba no tabata tin su Status Aparte, hamas Aruba por a introduci e plan di rescate cu cual el a introduci e turismo como e pilar economico grandi di Aruba.
“E momento tabata importante. Aruba tabata responsabel pa su propio actonan. Prome cu 1986 esaki no tabata e caso. Pues tabata e cuadro legal di Status Aparte cu a permiti e espacio cu e autonomia financiero a duna e prome gobierno di Aruba,” a wordo indica.
Pues si Aruba no tabata un pais cu Status Aparte, pero ainda tabata parti di Antia, e no por a realisa e plan di rescate cu tabata basa pues cu pueblo di Aruba tabata responsabel pa e proyectonan cu a wordo ehecuta pa haci turismo e pilar economico mas grandi di Aruba y asina soluciona problema financiero, economico y social.
