Vanessa Lovert-Williams:
ORANJESTAD (AAN) – Dr. Vanessa Lovert-Williams, Radioloog na Fundacion BOB, y co fundador di e stichting tambe.
Aworaki e tin e funcion di Radioloog Coordinador di Screening.
“Nos kier sali afo den Luna di October, pa un bez mas pone enfasis riba e beneficionan cu e screening tin, pa deteccion tempran di cancer na pecho y si detecta esaki tempran e tratamento por ta menos invasive y e chens pa sobrebibi esaki largo, ta mas grandi”, e dama a subraya.
Pa tal motibo BOB ta bezig pa seis aña caba pa screen cancer na pecho. E ta sigui splica.
“Hende muher entre 45 y 75 aña di edad ta ricibi un invitacion di Stichting BOB Aruba, cada dos aña pa conduci un screening.
“Lamentamente algun hende muher no por, of no ta duna oido na e invitacion. E porcentahe cu ta presenta ta varia rond di 40%. Nos ta purba pa hisa e percentahe aki”, dr. Lovert-Williams a expresa.
“E screening tin te cu aworaki, anualmente, entre 50 pa 60 persona cu ta wordo referi despues pa mas examinacion. Di e 4 of 5 personanan, un saliendo for di Stichting BOB Aruba ta keda detecta cu un tipo di cancer di pecho y tin cu sigui cu tratamento.
“Mayoria di e casonan di cancer di pecho (70% te cu 80%) no a keda detecta ainda door di e screening preventivo di Stichting BOB Aruba.
Den e casonan aki e pacient ta haya molester di e pecho, y ta acudi na su docter di cas y na su turno ta sigui e proceso. Mayoria vez ta detecta ora cu e cancer di pecho ya ta den un fase mas avanza. Esaki ta loke nos kier preveni, pesey e screening preventivo ta asina importante”, dr. Vanessa Lovert-William a subraya.
“Nos ta desea pa e mayoria di e casonan di cancer di pecho juist keda detecta via e screening preventivo di Stichting BOB Aruba. Esaki por nifica cu den e casonan aki e cancer di pecho ta keda detecta den un fase mas tempran”.
Si detecta e cancer di pecho tempran por duna e pacient mas chens pa tratamento y e chens di sobrevivencia ta bira mas grandi. Esaki ta loke na final ta conta. Por logra esaki door di aumenta e porcentahe di hendenan muher cu ta acudi pa e screening.
“Aumenta e porcentahe di hende muher cu ta bin pa e screening nos por logra unicamente si den e comunidad Arubano tin confianza den e programa di Stichting BOB Aruba y den e mammogram cu nos ta usando pa screening. Nos di Stichting BOB Aruba y tambe e docternan hunto cu e specialistanan medico cu ta responsable na Aruba pa e diagnostico y tratamento di e pacientnan cu cancer di pecho tin tur confianza den e screening preventivo a base di mammogram.
Screening preventivo riba base di mammogram ta e standard absoluto. Na e momento aki no tin un otro medio alternativo pa considera”, el a reitera.
Fundacion BOB ta confia cu e mensahe aki y e informacion cu ta sigui na e conferencia di prensa aki, en berdad por yega na tur habitante di Aruba den nan mayoria y mas importante cu e contribui na logra e confianza.
