Kita cadushi ta destruccion
ORANJESTAD (AAN): Riba Diabierna atardi laat, Olinda Rasmijn di organizacion StimAruba a emiti un mensahe, bisando cu tin di cuida Ser’i Noka su naturalesa, y corda cu su historia y lugar ta nos Patrimonio
“Kita cadushi ta destruccion, kita palo ta mata nos naturalesa, hobennan di henter mundo ta grita pa mantene Naturalesa! Greta Thunberg a grita den Nacionnan Uni mundo tende. Na Aruba, e hobennan no a tende?”
Nos Sero di Noka tin un teatro pa comunidad den naturalesa. Den delaster decadanan el a bira un lugar di Oracion y Resa Caminda di Cruz cu ta keda patras di Maria School. Arkeologonan a weita balor di Ser’i Noka, tabatin rastronan di Indjan.
Nos antepasadonan Indjan a biba aki. Tabatin hopi restonan di weya y tayonan kibra y urnanan cu nan a laga atras.
Arkeologonan a coba weyanan traha di lodo y nan saca for di e tera artefactonan traha na man. Tur ta Obranan traha na man, y mas conoci ta e urna cu haya ainda den dje restonan humano.
No por a conserva e cosnan bunita aki na Aruba, y a hiba nan Hulanda pa conserva nan.
Dos aña pasa Arkeologonan Arubiano a bay busca nan pa e pueblo por mira buniteza obranan di nos antepasadonan.
Generacionnan despues a traha e teatro, manera e ta awor. Grupo teatral Mascaruba a presenta un obra teatral na Serí Noka y a yama esaki: “Maria di Ser’i Noka”. Tabata den añanan 1963, y e teatro tabata un luga romantico cu naturalesa su rond.
A traha bankinan di cement y den forma oval pa hende por a sinta. E tempo ey a haci esey cu masha amor y cuidao, cu hopi respet pa naturalesa. Asina a traha e teatro den Ser’i Noka den aire liber.
Stichting Teatro Arubano a lanta cu e obheto pa stimula teatro aki na Aruba. A escohe e lugar aki, debi na su importancia como lugar historico y bunitesa. Ora cu a haci trabao, nan a scapa tur palo pa e lugar ta fresco. Matanan existente a keda como adorno.
Corda cu aki na Ser’i Noka tin 3 neishi di shoco cu ta nos Parha Nacional. Nan ta biba den Seri’Noka, y ya pa mas cu 20 aña nan ta den nan habitad. Den piedranan bo ta weitanan, bon scondi ta proteha nan neishi.
Aki pastoor Jansen a bin cu e bunita idea pa traha un “Caminda di cruz” unda cu fielnan ta resa hunto y canta e Pasion di Nos Señor Hesu-Christo. A resa y pidi fabornan, a resa pa Aruba su bienestar.
Den rooi tin palonan endemico cu casi no ta existi mas na Aruba. E lugar aki tin tanto obhetonan balioso, y StimAruba ta opina cu e mester cay bao proteccion di Monumento y Historia. Tur loke ta su rond ta valioso. Trankilidad ta reina den e naturalesa aki.
Olinda Rasmijn di StimAruba na final a puntra: “Aruba su hobennan no ta conciente di esaki?
Diasabra mainta 5 di October lo tin un “accion di limpieza” den Ser’i Noka, y StimAruba sigur lo bay ta vigilando.
