Tene cuenta!
ORANJESTAD (AAN): Super Food a ricibi notificacion for di su supplier na Hulanda, pa yama bek cierto belegnan pre-paketa for di Hulanda di marca Jumbo.
Esaki pa motibo cu e compania cu ta pre-paketa e belegnan aki no por garantiza e seguridad di e productonan aki pa consumo.
Super Food a kita tur e belegnan caba en cuestion for di ariba reki y ta importante pa nota cu ta trata solamente di belegnan pre-paketa for di Hulanda y NO di belegnan cu ta ser corta fresco y paketa den tienda na Aruba mes.
Tur beleg cu ta disponibel den tienda awor ta completamente sigur pa come. Super Food ta haci un yamada na tur cliente cu por a cumpra beleg pre-paketa for di Hulanda di marca Jumbo, pa verifica si e producto ta aparece ariba e lista di recall.
Si e producto ta ariba e lista, por fabor no come esaki, pero trece bek na nos customer service desk pa bo ricibi bo placa bek of cambia esaki pa otro producto.
Por mira e lista di productonan afecta tambe via e website www.superfoodaruba.com y ariba nan facebook page. Super Food Aruba ta pidi disculpa pa e inconveniencia aki.
