Home Parlamento Ta haci masha poco pa atende cu problemanan social

Ta haci masha poco pa atende cu problemanan social

84
0
SHARE
- Advertisement -

Parlamentario Candelaria

ORANJESTAD (AAN):   Robert Candelaria, Parlamentario di AVP, ta hopi preocupa con e caida den e poder di compra ta afectando Aruba riba diferente tereno. E ta manera un circulo vicioso cu ta bay direccion entre otro di problemanan social.

“Semper mi ta bisa cu nos mester bay bek to the roots. Hopi biaha nos ta papia cu nos kier bay bek na e Aruba di antes. Mi ta corda cu mi wela cu tabata biba aki den Playa tabata laga su auto habri cu yabi y tas den auto. Anochi prome cu e bay drumi e ta bay saca nan for di auto y lock e. Cas ta keda habri henter dia. Hecho ta cu e Aruba ey ya no t’ey mas. Pero loke tabata existi antes y cu tabata e fundeshi di un sociedad mas sigur, si nos por traha riba dje pa dun’e un luga central bek. Mi ta papia aki di e nucleo familiar. Esey tabata e pilar di nos comunidad,” Candelaria a expresa cu hopi nostalgia.

Su filosofia ta cu un famia stabiel ta e base pa un bario stabiel; un bario stabiel ta e base pa un districto stabiel y un districto stabiel na su turno ta e base pa un pais stabiel. “Esaki tabata un potret di nos comunidad no mucho tempo pasa. Nos mester traha pa haya e fundeshi aki bek.”

Den politica y den comunidad tin hopi discusion riba e situacion social pero tin masha poco cosnan concreto tumando luga pa deal cu esaki. Politiconan no t’ey pa señala e problemanan so, pero tambe pa contribui na yega na posibel solucion. Esaki ta encera tambe pa continua politicamente cu loke ta corecto.

“Ora bo hereda algo, pa mi uza un palabra hopi popular pa e gobierno aki, y loke bo a hereda ta bon, mester sigui cune, of mehora esaki na bo gusto y segun bo vision. Pero no stop’e, pasobra e no ta di bo gobierno. Mi a yega di duna algun ehempel di proyectonan asina di Gabinete Mike Eman I y II.”Esakinan ta algun ehempel di hopi mas proyectonan cu por sigui traha riba nan, of adaptanan segun bo vision.”

Kluster 4 cu ta yuda hobennan cu mester di esaki cu nan educacion; Centro Ortopedagogico; E trayecto di sociale vorming hunto cu e militarnan pa train hobennan y duna nan disciplina y yuda nan den nan oportunidad pa futuro; A subi onderstand cu 25%; A aumenta kinderschooltoeslag pa famia cu ta den onderstand cu Awg 250 adicional pa gastonan di scol; Nos Atardi ta un trayecto cu ta brinda hobennan di scol secundario yudansa y guia cu nan lesnan; A introduci pensioen general pa tur hende.

Di e forma ey, Gobernacion di AVP no a solamente papia di tin e ser humano central, pero a traha pa demostra esaki cu hechonan den gobernacion.

E Parlamentario a propone pa na un manera efectivo pa yuda preveni retonan social ta pa inverti den nos hendenan, pasobra ta e hende mester wordo ekipa y prepara pa yuda su prohimo. “Mi no ta referi na friends and family, pero na hende bon prepara y motiva pa yuda su comunidad. Gobierno mester yuda stimula esaki. Nos mester di coach y mentor den nos comunidad. Hendenan cu ta haya support pa yuda otro sali di nan situacion dificil, pa cambia di nan caminda pa maldad y scoge un bida productivo pa sociedad. Mester stimula fundacionnan cu ta traha na bienestar di famia y di e individuo hunto cu iglesianan pa uni forsa pa yuda nos comunidad cambia e direccion cu e ta bayendo y mehora pa e sigiente generacion. Tin ora mester haci escogencianan impopular awor, pa piki e frutanan di un miho sociedad mañan.”

Tur hende cu ta traha cu hende mester wordo splica cu nan por contribui cu nan granito pa un miho Aruba, manera e trahador social; juffrouw di scol; polis; lider spiritual; esnan den prensa y esnan den comercio.

Tur mester wordo stimula y ekipa con por yuda fortalece nos prohimo pa ta un miho ciudadano. “Esun cu mester cana dilanti den esaki ta gobierno. Si nos traha di e forma aki, nos no ta yuda algun so y laga otro na caya. No, asina nos ta yuda Aruba henter. Esey mester ta e reto di cada gobierno.”

 

- Advertisement -

DUNA COMENTARIO

Please enter your comment!
Please enter your name here