Home Tempo Temporada di sorpresa den condicion di tempo a yega

Temporada di sorpresa den condicion di tempo a yega

50
0
SHARE
- Advertisement -

Cu entrada den luna di October, Aruba a yega na e temporada di cambio di tempo. E ultimo parti di temporada di horcan a cuminsa. Ainda ta posibel pa olanan tropical presenta nan mes y hasta desaroya den sistemanan tropical mas importante.

Pues no por descarta ainda e posibilidad cu un sistema tropical por desaroya den e region.

Cifranan ta indica cu esaki ta e temporada cu horcannan mas bien ta manifesta nan mes na den Golfo di Mexico. Tambe e direccion cu e sistemanan ta sigui no ta cuadra semper cu e patronchi di pariba bay pabou.

E conducta di sistemanan tropical y fin di nan temporada tin relacion cu e sistemanan climatologo global.

Durante e siman cu a termina, Aruba a haya dos tipo di sistema cu a trece porfin yobida pa Aruba. Por bisa hasta cu despues di basta dia, Aruba a conoce un siman cu mas dia cu posibilidad di awasero cu a trece un cantidad di 18.4 millimeter y 16.8 millimeter.

Pasashi di un ola tropical, cu ta un sistema cayente, pero tambe pasashi di un sistema friu tabata tin resultado pa e Zona di Convergencia, e region den cual bientonan ta topa, y cu actualmente ta riba Aruba tambe.

E zona aki, den cual sistemanan tropical ta nace, ta un di e motibonan pa bisa e momento exacto cu awasero por sorprende Aruba. Servicio Meteorologico ta anuncia cu e condicionnan pa awasero, posibel strena y lamper, ta presente pero ta depende riba e momento cu e sistemanan cu ta biaha den region ta activa e Zona di Convergencia Intertropical cu por alcansa Aruba den corto tempo.

Den e dianan aki pues mester tene cuenta cu ora tin e anuncio cu condicionnan ta faborabel,  tene cuenta cu cualkier momento awasero pisa por yega.

Den e temporada aki pues Aruba por haya su mes cu resultado di sistemanan friu cu ta baha for di Merca pa sigui move den direccion di pariba bay pabou. E sistemanan aki tambe ta activa e Zona di Convergencia Intertropical manera e yobida di e siman aki a mustra.

E sistemanan friu cu ta cuminsa manifesta nan mes, tin influencia riba sistemanan tropical di temporada di horcan cu oficialmente ta termina na fin di November.

Fin di aña lo conoce inicio di un temporada di yobida diferente. Frentenan frio generalmente ta pasa pa Noord di e region. Biento for di Noord Oost lo carga nan trece como yobida pa Aruba den e temporada grandi di yobida.

Pa e proximo dos dianan e condicionnan a faborece pa nubianan pisa subi for di Venezuela.

Servicio Meteorologico semper ta avisa ora condicionnan serio por presenta debi na yobida pisa.

- Advertisement -

DUNA COMENTARIO

Please enter your comment!
Please enter your name here