Tambe kier lanta un fundacion pa bringa derecho di pashent
ORANJESTAD (AAN): Manera DIARIO a trece dilanti caba, Tico Valdes ta un pashent di cancer. Den un entrevista el a duna di conoce cu e tabata bringando pa su derechonan como pashent pa haya e tratamento adecua pa su malesa.
El a bay Bucaramanga den luna di Juli y ayanan el a logra pa e wordo opera. Awendia e ta recuperando di su operacion y ta dunando Dios danki pa e di dos chens cu el a haya den e mundo aki.
Sinembargo, Valdes tin su remarcanan. E ta lamenta cu na Aruba e prome cos cu ta haci ta duna kimioterapia. No ta zorg pa haci un investigacion pa wak den ki fase e persona ta.
“Mi ta encurasha hopi hende cu si nan tin e problema pa bringa nan caso mester wordo stimula y encurasha, ami tey pa yuda nan”, Valdes a subraya.
Fin di luna, a bisa, e tin cu bay bek Colombia pa un control cu e specialista cu a opera su higra. 60% di su higra el a perde. Kiermen cu 40% el a keda cune. E ta bay crece bek, a indica, “full no. Nan no por bisa. Dios so por haci milager”.
El a cuestiona tambe pakico AZV a bolbe nengu’e di bay haci su control na Colombia, pasobra e doctor cu e oper’e no ta biba na Aruba siendo cu nan departamento di Oncologia ta bisa cu no, cu nan por control’e aki na Aruba.
A base di kico ta bay controla algo cu no a wordo haci na Aruba, a cuestiona. Kiermen e tin cu bay bringa pa e por bay Colombia atrobe.
Tin casi 8 mil pashent di cancer na Aruba y te ainda no tin un base di datonan pa wak cuanto a muri, ken a cura, ken ta den fase di curacion y ki alivio tin pa nan. Na Aruba no tin beleid pa oncologia, a subraya.
Finalmente Tico Valdes a gradici prensa cu e dune oido durante su lucha. A laga sa cu aworaki e ta den proceso pa cuminza un caso civil contra AZV, pa e gastonan, tratamentonan. E ta sigur cu e ta bay gana e caso aki.
E fondo cu e ta haya for di AZV e no ta uz’e p’e. “Pa mi no ta importante. Mi a haya un otro chens caba’, a expresa.
Valdes su deseo ta pa lanta un fundacion cu lo bringa pa pone statuutnan pa loke ta e derechonan di e pashent. E procedura tey. Mescos cu na Hulanda, a agrega.
