Algo bayendo robez na Aruba
ORANJESTAD (AAN): Aruba ta preparando fervientemente pa e Censo 2020 cu ta den porta.
Den un entrevista cu Yarelyn Figaroa-Kelly di Oficina Central di Estadistica (CBS), el a elabora riba e prome siman di e Censo Piloto preparando pa 2020.
Pa nan sorpresa, nan ta bin confronta cu publico no ta asina “habri” mas pa duna informacion. Y nan a hasta bin topa cu menaza y hende no ta coopera.
Mas di un siman caba cu a cuminza cu e Censo Piloto y nan tin un promedio di 60 pa 65% di adres completa. Tin algun tel distrikt cu ta hopi abao den esaki.
Manera ta conoci, Aruba ta dividi den 5 tel distrikt manera Noord, Oranjestad, Paradera, Santa Cruz y San Nicolas. Y den cada tel distrikt tin 15 tel blok.
El a menciona cu e.o. distrito di Noord tin Esmeralda y vecindario cu tin solamente 27% di adresnan completa. Esaki ta algo “abao”.
Den Oranjestad tin Sero Blanco cu tin 38% so completa. Den Paradera tin Koeriboeri tin solamente 10% completa. Pesey ta pidi cooperacion di e habitantenan. Den Tanki Leendert ta solamente 37%.
Santa Cruz tin e tel blok Picaron cu 37%. Sero Preto San Nicolas y Weg Rooi Congo tin promedio di solamente 49 pa 50% so ta completa.
Nan ta gradici tur esnan cu a coopera pa e Censo Piloto aki. Nan kier a pidi mas cooperacion di pueblo, principalmente den e tel bloknan cu ainda falta.
CBS sa cu tin hendenan ta trahando cierto warda, of dos trabao, y ta haci casi imposible pa nan worde entrevista. Pero nan mes por contact Censo2020@cbs.aw pa asina haci un cita cu e tellernan pa pasa cas pa un entrevista.
Nan ta haci suplica na pueblo pa no trata e tellernan malo. Hopi di nan ta hayando zundra, y hasta ta haya menaza.
Segun Figaroa-Kelly, ta mustra cu e tellernan ta haciendo nan trabao, y nan maximo esfuerzo pa logra lo maximo adres. Pero ta hayando un mal recepcion na e casnan.
“Nan ta haci esaki na bienestar di Aruba, y ta fastioso pa nan ta yega y bisa nos cu nan a worde menaza, y no kier haci esaki mas.”
Nan ta hayando hopi zundra, y ta spera cu e mentalidad di pueblo cambia un tiki.
E Censo Piloto aki pues ta dunando un bista kico por spera ora cu e Censo 2020 cuminza otro aña.
Pronto lo evalua con e Censo Piloto aki a bay bon of malo, pa asina traha riba dje y fix e asunto prome cu e Censo 2020 cuminza.
