Eduard de Cuba: Kier bin cu leynan mas moderno
ORANJESTAD (AAN): Comandante di Bombero, Eduard de Cuba a declara cu nan ta bezig cu e ley di Brandweer. Ta haciendo un revision y tin diferente ley manera esun cu yama “Brandweer Wet’ cual ta institui Brandweer y kico e ta haci.
Tambe tin leynan regardando e posicion legal di e trahadornan. Tin keuringnan medico te na keuringnan di condicionnan fisico. E aña aki ta bay haci 7 aña cu e ultimo a wordo institui, cual ta esun di e posicion huridico di e personal, De Cuba a indica.
A sinta cu varios di e trahadornan y a ripara cu a bira tempo pa revisa esey tambe. Den e mesun trend tambe a hiba tur e leynan cu ta regarda brandweer den un revision pa asina por bin cu leynan mas moderno unda cu tin mester, a señala.
Den e combersacionnan cu Minister di Husticia, el a mustra basta positivo den esaki pa loke ta e modernizacion di e organizacion como tal, ademas di e leynan cu ta sostene Cuerpo di Bombero, a remarca.
E leynan cu tin aworaki ta cubri tur escenario y tur locual tin. Pero e meta ta pa reforza y progresa. Mester di leynan cu ta adapta nan mes. El a menciona e caso di e radionan, cual antes tabata gewoon ta cumpra un radio y na cas ta scan e señal. Pero awor tin radionan digital y mester cierto permisonan pa uza nan y esey ta aspectonan cu no ta den e ley, de Cuba a enfatiza.
A menciona coremento cu luz blauw, cu sirena. Tur esaki mester wordo revisa pasobra trafico na Aruba a bira hopi mas pisa y ta hopi mas peligroso. E risico ta bira mas halto ora cu core den un emergencia y su consecuencianan.
Eduard de Cuba a laga sa cu e cooperacion di e chofernan ora di un emergencia mayoria di biaha ta bay hopi bon. Pero tin biaha cu no ta posibel pa e chofer hala lo suficiente. Tambe tin chofernan cu ta probecha cu Brandweer ta pasa y nan ta pasa hunto cu e truck.
Un tips simpel ta, a bisa, “si bo no por hala for di e caminda. Si tin aceranan halto of tin autonan para banda di caminda, just purba di sigui core bay. Pa bo por hala for di e caminda mas pariba. Pero si bo no por baha for di e caminda, no dal para meymey di e caminda pasobra e ora nos tampoco no por pasa. E emergencia no ta warda pa nos yega”, de Cuba a finaliza bisando.
