Stichting Reclassering en Jeugdbescherming:
ORANJESTAD (AAN): Stichting Reclassering en Jeugdbescherming Aruba ta un instancia cu entre otro ta encarga cu ehecucion di e werkstraf y e leerstraffen (castigo den forma di trabou pa comunidad of un programa educativo) cu a wordo imponi riba un persona sea door di un Fiscal, Hues of pa medio di un decreto Ministerial.
Un di e otro trabaonan importante cu Reclassering ta ehecuta ta trata e guia di personanan cu a wordo poni bou supervicion di Reclassering.
E edad di nan grupo di meta ta varia. Nan ta trata cu personanan di edad jong esta desde 12 aña bay ariba pero tambe cu adultonan cu ta ariba 60 aña.
Departamento Sancionan Alternativo
Un cantidad di aproximadamente 320 persona pa aña ta haya un castigo alternativo.
Den e articulo aki kier pone enfasis ariba e departamento di Reclassering cu ta trata cu e Werk- y leerstraffen esta Sancionan Alternativo y specificamente ariba e trabou pa comunidad (werkstraf).
Un werk- of leerstraf ta wordo imponi (opgelegd) mas tanto den casonan leve unda un castigo di prison na prome instancia ta mucho pisa, dus e ta fungi como un alternativa pa evita bay sera.
E personanan aki di un manera of otro a haya nan mes den contacto cu Husticia door di a comete un acto cu ta contra e ley, cual ta pone cu nan por haya un werk-of leerstraf. Un ehempel di un castigo alternative ta participacion obligatorio na un curso educativo p.e. Curso di Maneho di rabia of curso di Manehando bou Influencia.
E trabou pa comunidad ta encera cu e persona en cuestion mester cumpli obligatoriamente cu un cantidad stipula di oranan. Tambe nan por haya un combinacion di e dos tipo di castigo castigo alternativo.
Proyectonan
Pa loke ta trata e castigo alternativo di trabou pa comunidad ta traha cu diferente proyecto/instancia. Ta trata algun instancia di gobierno y fundacionan/organisacion non-profit.
Por ehempel Centro di bario, Complehonan Deportivo, Cas di Cuido (cu ta fundacion), Sport Vereniging, Club Social, Misa etc. Actualmente tin como 50 proyecto ta participa uy ta haci uzo di e proyecto cu bon resultado.
E persona en cuestion ta yuda eherce diferente tareanan pa cual e instancia tin necesidad sin gasto adicional. Esaki por ta trabaonan di mantenimiento di facilidad, trabou di limpiesa, chapi, trabou administrativo etc. Esaki ta depende di e cualidadnan/habilidad cu e persona tin. E trahador di Reclassering ta purba saca afo cual habilidad e persona tin, pa asina match e persona mas miho posibel cu un instancia.
E personanan aki ta paga pa nan eror door di duna un man na instancianan cu ta aporta na e bienestar y desaroyo di nos comunidad.
Kier enfatisa cu e grupo di meta cu cual e departamento aki ta trata, ta personanan cu a comete un delito, den mayoria caso leve. Ta personanan cu ta bin di diferente clase social- economico.
E deseo pa e departamento aki ta pa amplia e cantidad y principalmente e tipo di proyectonan, pa asina trece mas variacion den trabou.
E rekisitonan pa por ta un Proyecto ta hopi simpel:
Mester ta un fundacion/ non-profit of un instancia di gobierno.
Mester tin un projectbeheerder/supervisor disponibel, pa por guia y controla e persona den su tareanan y tambe controla su oranan.
Mester tin tur material necesario pa por ehecuta e tarea
Mester ta dispuesto pa comunica frecuente cu Reclassering tocante e ehecucion di e trabou.
Kiko ta e beneficio pa e Proyecto?
E Proyecto:
Por yega na caba sierto poryectonan pa cual no tin un budget grandi.
No mester paga pa e labor, asina por aloca nan fondonan pa otro necesidad
Por yega na un voluntario pa den futuro. Tin varios caso cu un persona a traha asina bon of a click bon cu un organisacion cu despues cu nan a cumpli cu nan oranan obligatorio di trabou pa comunidad, nan ta sigui hasi trabou voluntario pa e instancia.
Kier bolbe enfatisa cu e meta di e castigo alternativo di trabou pa comunidad no ta solamente pa laga un persona cu a comete un acto contra ley paga pa e acto ey, pero alaves dunando e persona un chens pa siña for di esaki.
Stichting Reclassering en Jeugdbescherming Aruba kier haci un peticion na instancianan den comunidad cu lo ta interesa den un samenwerking/ colaboracion y cu lo kier haya mas informacion pa tuma contacto cu nan na telefon 582-2491 of 5821496. Nan oficina ta situa na Caya Ernesto 21-C.
