Home Hudicial 12 y 16 luna di prison pa ladronnan di caha fuerte for...

12 y 16 luna di prison pa ladronnan di caha fuerte for di Burger King

66
0
SHARE
- Advertisement -

Polis a gara nan cu e caha fuerte ainda den auto

ORANJESTAD – Manera DIARIO a publica, e hombernan W.W. y A.M. a presenta dilanti Hues pa duna cuenta di e hortamento di un caha fuerte completo for di Burger King Oranjestad. Polis a actua liher y den 40 minuut despues di e ladronicia a para e Van den cual W.W. y A.M. tabata cu e caha fuerte.

A haya un arma di candela banda di A.M. cu tabata e chofer di auto pero A.M. ta para riba cu e arma no ta di dje. Hues a declara A.M. liber di e acusacion di tabatin un arma di candela. Esey a haci cu su castigo a baha tambe. 

ACUSACIONNAN

E acusacionnan cu Fiscal a presenta ayera den sala di Corte contra e duo aki ta cu riba 29 April 2019, nan a horta un caha fuerte na Burger King Oranjestad. Fiscal ta acusa A.M di posecion di arma di candela riba e mesun dia. Fiscal a acusa W.W. cu dia 16 April 2019, incubrimento di un cantidad zapato nobo procedente di ladronicia. 

HORTA CAHA FUERTE

Hues a bisa cu W.W. no kier a papia pero A.M. si a papia cu Polis. Polis a bisa cu mas o menos 5 or di marduga, a drenta yamada na warda di Polis cu dos hende den un Van lo tabata horta na Burger King. Polis a yega na Burger King pero ya e auto a bay.

Mas o menos 40 minuut mas laat, Polis a para nan. A.M. tabata stuur y W.W. tabata patras cu e caha fuerte. Den auto tambe a haya banda di e chofer, un tas cu un revolver color nikkel. Segun A.M., e tabata core auto y W.W. a acerk’e pa bay cun’e Burger King pa busca algo. W.W. a bay den e lugar y Sali cu algun tas. Despues cu core bay, W.W. a bisa A.M. cu el a coy un caha fuerte.

W.W. no kier a declara nada di Polis. Den Corte el a bisa Hues cu e kier papia. El a bisa cu e tabata cana den caya y a mira dilanti Burger King e caha fuerte cu un tas preto riba dje. El a cana bay Rancho y topa cu A.M. kende el a pidi pa yud’e.

Segun W.W., el a hinca e caha fuerte y tas den e Van patras. Na dado momento el a bisa W.W. cu el a coy caha fuerte. A.M. a hala su atencion cu e mester a bis’e for di tempran. Segun W.W. e anochi ey tabatin blackout. El a bisa cu promer e tabata sinta dilanti den auto y a pone e tas y despues el a bay patras. Ora el a bisa A.M. cu el a coy un caha fuerte, A.M. kier a hiba e caha fuerte bek y net e ora ey Polis a para nan.

Hues a haci W.W. un serie di pregunta, entre otro cu el a cana bay te Rancho y despues bin cu A.M. Segun W.W., e so a hinca e caha fuerte den e Van. Hues a bisa cu tabatin notificacion cu dos hende tabata forzando porta di Burger King y rato despues nan a wordo deteni. A.M. a bisa Hues cu e no tabata sa kico tabatin den e tas. Ta W.W. a bin cu e tas y dun’e pa pone dilanti.

Hues a mustra cu W.W. su carchi di castigo ta yen di caso di ladronicia. Hues a remarca cu net W.W. a wordo laga liber despues di tabata 10 dia sera pa e cantidad di zapatonan nobo cu e tabatin cun’e y el a bay horta e caha fuerte.

 

FISCAL

Fiscal a bisa Hues cu ta convicente cu e duo aki tabata forza e porta di Burger King. Polis un rato despues di bay Burger King a haya e Van y e caha fuerte. Ta un persona conoci pa Polis a notifica cu el a mira dos homber a horta na Burger King. Fiscal a bisa cu e no ta kere mucho e declaracion di A.M. kende a bisa cu un persona a pidi pa yud’e.

Polis a haya banda di A.M. un arma di candela, E situacion tabata mustra cu ta A.M. ta esun cu e arma. Fiscal a mustra cu algun dia promer a haya W.W. cu un cantidad di zapatonan nobo cu ta procedente di ladronicia. W.W. no ta un desconoci di Polis. E tabata 10 dia sera pa e zapatonan cu mester wordo considera como un aviso pero manera el a Sali el a bay horta un caha fuerte.

Fiscal a exigi pa W.W. 18 luna di prison di cual 6 luna ta condicional cu un tempo di prueba di 2 aña. Segun Fiscal, A.M. ta otro asunto. No solamente e ta envolvi cu ladronicia pero tabatin un revolver pero sin bala. Fiscal a exigi 24 luna di prison di cual 6 luna ta condicional cu un tempo di prueba di 2 aña.  

ABOGADO

Abogado mr. Kock di A.M. a bisa Hues cu W.W. a bisa cu el a haya e tas riba e caha fuerte y el a hiba esaki den e auto. Den e auto dilanti el a laga esaki y bay patras unda el a pone e caha fuerte. E ta haya cu no por persigui A.M. pa arma sino W.W.

El a bisa tambe cu un persona a bisa di a mira dos hende ta hortando pero Polis no a bin cu fingerprint. Esey ta mustra cu no tin prueba cu ta nan a horta.

E ta haya cu aki mester papia di incubrimento o sea a coy cos cu ta procedente di ladronicia. E abogado a pidi pa impone castigo pa W.W. igual na loke el a sinta cu un parti condicional. E ta haya e castigo exigi pa Fiscal mucho halto. Pa A.M. el a pidi Hues pa duna castigo igual na loke el a sinta. 

SENTENCIA

Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu W.W. y A.M. dia 29 April 2019 a horta un caha fuerte. Hues a mustra cu tin un homber a yama Polis y bisa cu el a mira dos hende ta hortando. Polis a yega pero nan a bay caba.

Mas o menos 40 minuut despues ta detene nan den e auto. Na opinion di Hues, ta un tempo asina cortico cu ta haci cu ta e duo ta esun cu a haci e ladronicia na Burger King.

Hues a bisa cu e no ta kere e storia di W.W. cu e caha fuerte tabata pafor di Burger King. Pa loke ta arma di candela, Hues a bisa cu a haya esaki banda di e chofer den un tas. E auto ta di A.M. y A.M. a bisa Polis cu e tas ta di W.W. Hues ta haya cu no tin suficiente prueba cu realmente e arma ta di A.M.

Pesey Hues ta declara A.M. liber di e acusacion di posesion di arma. Hues a sigui bisa cu e ta haya W.W. culpable pa incubrimento di zapatonan nobo.

El a mustra cu W.W. apenas a wordo laga liber y a bolbe bay horta. Hues a condena A.M. na 12 luna di prison, kitando e tempo cu e ta sera den KIA.

Pa loke ta W.W., Hues a bisa cu W.W. ta un residivista y a conden’e na 16 luna di prison, kitando e tempo cu e ta sera den KIA.

- Advertisement -

DUNA COMENTARIO

Please enter your comment!
Please enter your name here