Ta conseha pa trece bestia fin di November caba:
ORANJESTAD (AAN) – Ronny Bareño, di Servicio Veterinario di Departamento di Salubridad Publico, den entrevista cu DIARIO a duna informacion tocante e temporada di mata bestia manera porco, cabrito y bestia chikito cu metanan comestibel, cual ta usual durante e luna di December.
Bareño a menciona cu durante henter e aña semper Servicio Veterinario tin un fluho di matanza di bestia cu ta minimo, y cu ta tuma lugar riba Diamars y Diahuebs.
No obstante ora fin di aña yega, November y December ta un periodo hopi druk pa e departamento aki. Pesey e ta pidi tur hende pa bin na tempo y preferiblemente mainta for di 7’or y no mas laat cu 9’or.
Nan dianan pa mata bestia ta Diamars y Diahuebs solamente, debi cu e fluho ainda no ta hopi, pero na December nan lo habri di Dialuna pa Diahuebs. Diabierna ta cera. E ta pidi tur hende bin tempran di 7 pa 9’or di mainta, trece nan bestianan y si tin hopi bestia pa mata (entre 5 pa 30 of mas) yama cu algun dia adelanta, pa por haci un afspraak y coordina esaki, pa evita cu e bestianan ta warda hopi prome cu nan wordo sacrifica.
Ultimo dia pa mata bestia lo ta Diamars 15 di December, y no trece nan na ultimo. Cuminza bin na fin di November mes y comienzo di December caba.
Bareño a splica cu na December e demanda pa mata porco y bestia chikito ta asina hopi, cu e matanza ta bira mas druk, y pesey nan ta habri di Dialuna te cu Diahuebs.
Hopi importante ta, cu tur bestia cu ta wordo sacrifica pa bende riba mercado, mester wordo haci na abatoir. Servicio Veterinario tin expertonan pa controla e animal bibo; nan ta mira si e ta saludable y si ta apto pa wordo sacrifica. Tin caso cu nan ta informa e doño cu e animal no ta saludable y ta sugeri pa hibe veterinario pa recupera, y tin caso unda e persona ta splica cu e no por afford e veterinario, anto nan ta pone drumi pero no ta bay pa consumo. E ta wordo afgekeurd y tira afo.
Esaki ta un tarea cu Servicio Veterinario tin cu haci, y e ta bayendo bon. Sr. Bareño a menciona cu e ta ripara cu ultimo tempo hopi cacho ta ataca cabrito y carne cu ta mas indefenso, y ora e doñonan ta trece nan na abatoir nan ta wordo afgkeurd pasobra por ripara den e cuero cu esaki ta full daña. Di pafo e bestia por mustra bibo y bon, pero paden e ta na werki. Den e ultimo añanan aki e ta sosode hopi, sr. Bareño a subraya.
E animalnan cu ta wordo afgekeurd ta wordo hiba na Serlimar unda nan ta wordo destrui na e manera apropia.
E ultimo aña no a haya animalnan cu a wordo afecta pa un virus, pero e sa pasa tin biaha, ora cu algun virus ta bin Aruba y por causa malesa den e animalnan.
Pero den e cria di cabrito y porco e ultimo añanan aki no a ripara nada di fuera di lo comun. Mas tanto porco cu cabrito ta wordo mata na Aruba, leu ley un cuater baca pa aña, loke ta hopi minimo.
Pa loke ta porco tin un trend mas halto, pasobra e ta mas facil pa cria, y cabrito a bira menos debi na urbanizacion y esnan cu antes tabata cria cabrito a baha e produccion. Di 300 pa 400 den pasado awo a baha pa 20-30, pasobra no tin espacio pa nan, y como cu e clima di Aruba ta seco, tin cu cumpra cuminda pa nan y esey ta sali caro.
