Home arte y espectaculo Academia Musical lo dedica nan show di 25 aña na Padu Lampe

Academia Musical lo dedica nan show di 25 aña na Padu Lampe

200
0
SHARE
- Advertisement -

ORANJESTAD (AAN)- Diadomingo awor dia 1 di December Academia Musical lo celebra nan di 25 aña di existencia den Cas di Cultura cu un tremendo show y entrega di diploma.

Academia Musical ta bao direccion di Sr. Edgard Kelkboom kende a caba di ricibi un reconocimiento di Departamento di Cultura como musico un un carera hopi significativo pa Aruba.

Tambe nan a documenta su biografia cu lo sirbi como muestra pa e futuro generacion.

Academia a cuminza puramento pa un casualidad cu un bisiña a bay puntra Edgard pa algun akkoord ariba cuarta y despues di 2 luna ya tabata tin 15 alumno.

Despues el a sigui crece y mester a traha local nobo pa por a acomoda mas alumno. Despues di un paar di aña a bin e peticion pa duna les di harpa, gitara, viool, mandolin, percussion y base-guitar. Asina e scol a sigui crece y a sobrepasa mas di 100 alumno.

Ya di e prome aña a cuminza organiza na final di aña un show chiquito na cas cu entrega di certificadonan y despues a hacie den Clubhuis De Trupialen a sigui pa Biblioteca nacional y por ultimo den Cas di Cultura te cu awe.

Academia Musical lo sigui mientras e salud ta permiti ya cu ta un trabao noble ora bo ta yuda kita muchanan for di riba caya y ta contribui cu cultura di bo pais.

Diadomingo awor e show y entregamento di certificado lo worde dedica na nos tata di cultura kende a fayece dia 28 di November 2019, Padu. Padu semper a duna nan e animo pa continua y e tabata e persona cu tabata haci e entrega di certificadonan na e alumnonan.

Pa e aña aki tambe e grupo di Academia Musical Harpa di Pasco tin riba mercado nan CD pa un Bon Pasco y Bon aña 2020. Riba e cd tin clasiconan di Academia Musical y tin un repertorio masha bunita mes. Harpa Musical ta consisti di Edgard Kelkboom, Isabel Croes, John Croes, Querino Ras, Hendrik Kelkboom y Ruben Croes.

- Advertisement -

DUNA COMENTARIO

Please enter your comment!
Please enter your name here