Resumen
Pueblo di Aruba a dicidi pa e supuesto peso di coalicion
*Si Mike a forma gobierno awe Lejuez lo ta den oposicion cu MEP
*Betico Croes a bira victima di wega cu coalicion na eleccion
Aruba e siman aki a haya su mes cu otro caso politico sumamente straño. Un miembro di Parlamento a dicidi cu e no ta sostene gobierno actual mas pa motibo di un ley riba cual ainda Parlamento mester dicidi.
Pa nos por cera e capitulo di Daphne Lejuez awe, nos mester expresa nos asombro cu Lejuez no ta na haltura pakico como miembro di fraccion di MEP el a sostene e gobierno di MEP, POR y RED.
Ya ayera DIARIO a mustra cu den e forma cu Parlamento a atende cu e proyecto di Ley di Serlimar, no tabata tin nada contra regla. Te awe e proyecto no a haya aprobacion ni rechaso cerca Parlamento cu ainda mester dicidi.
Loke ta straño ta e hecho cu como miembro di Parlamento, Lejuez no ta conoci cu nos reglanan cu ta indica cu pueblo ta dicidi cual gobierno ta haya mando di e pais.
Ora nos analisa historia di Aruba, nos ta mira un momento cu coalicion a bira un triki pa partidonan tumba un opositor y a base di formacion di un coalicion, drenta gobierno.
Lejuez por puntra e politiconan cu ta pura pa defende su persona awor cu el a cambia di partido, si no ta berdad cu ora Betico Croes a crea e fundeshi pa Aruba como pais por tabata tin su propio gobierno, prome cu eleccion a forma un coalicion pa bay contra Betico.
Ta cu un coalicion, forma prome cu eleccion y haciendo uzo di e tragedia di e salida di Lago, porfin a logra baha Betico Croes cu a marca historia como politico cu logro pa Aruba.
Na 2017 Aruba no a bay eleccion cu un coalicion di MEP/POR/RED como solucion pa pueblo. Lejuez ta bon na haltura cu ta pueblo di Aruba a dicidi cu e no kier mayoria absoluto mas.
Na 2017 ta pueblo di Aruba a dicidi cu e kier un coalicion pa motibo di loke e mayoria di gobierno Mike Eman a haci cu Aruba. Si ta necesario por refresca memoria di Lejuez kico e como candidato di MEP, a bisa Aruba.
Na e momento aki sinembargo, nos no tin mucho tempo pa e detaye aki. Loke si mester splica bon cla ta, cu te awe Mike Eman no kier drenta Parlamento y ta riba baricada cu 7 Mil voto riba su lomba.
Lejuez ta liber pa haci loke e kier. Ta su asunto mescos cu tabata su asunto pakico e kier tabata parti di MEP y sali di MEP.
Si Mike a forma gobierno na 2017 cu RED y POR, awe Lejuez lo tabata den oposicion di MEP.
Lejuez mester respeta decision di pueblo cu a dicidi cu e no kier mas mayoria despues di e desastre di Ensure den Watertoren, creacion di e debe nacional y e secreto nacional di Citgo.
Na forma democratico Lejuez a acepta e peso riba su lomba. Ban spera cu su lomba lo keda liber di peso awor cu e ta independiente. Pero drenta historia cu berdad.
