Aruba den curason di un guera friu cu ta bira cayente

    1242
    0
    SHARE
    - Advertisement -

    Alerta di siguridad pa creciente tension den region

    *Bolivia ta bira e forsa contra avance comunista den region

    *Oposicion di Guaidó ta haya momento nobo na Venezuela

    ORANJESTAD  (AAN) — Manera DIARIO a cuminsa adverti for di siman pasa, e situacion den region Latino Americano y Caribense a sigui crece. Durante fin di siman un guera friu entre paisnan domina pa dictadura iskierdista y nan opositornan a continua na America Latino.

    Pa Aruba esaki ta nifica cu e situacion regional ta di preocupacion grandi. Informantenan ta revela cu instancianan oficial a aumenta e grado di vigilancia di siguridad na Aruba.

    “E guera friu a bira cayente cu organisacionnan internacional enfrentando otro. Confrontacionnan politico a bira severo y mas sangriente,” a wordo treci dilanti.

    “Bolivia lo no bira otro Venezuela,” tabata e decision di ciudadanonan na Bolivia, caminda Forsanan Arma a uni cu gruponan di protesta y a exigi e comunista Evo Morales pa baha como presidente.

    Nan a basa nan mes riba e resultadonan di eleccion cu a wordo considera fraudulento segun e Organisacion di Estado Americano cu a pidi pa bolbe conta voto.

    Pueblo no a acepta un eleccion nobo pero na forma violento a exigi Morales baha y bandona e pais.

    Jeanine Añez, un abogado cu ta miembro di Senado for di 2010, a bira e Presidente interino mientras e pais ta prepara pa eleccion nobo.

    Su prome paso tabata pa deshaci di tur loke tin sikiera holo di comunismo na Bolivia. El a manda tur diplomatico di Venezuela cas y a debolbe Cuba 700 dokter cu tabata traha na Bolivia.

    Confrontacion pisa ta tuma luga na Bolivia mientras na Mexico, paisnan iskierdista ta reuni. Entre nan tin Argentina cu recientemente a vota pa regreso di Peronismo.

    “Union Europeo mester expresa su mes. Union Europeo tabata atende cu Morales riba cierto asuntonan,” informantenan ta bisa.

    Importante na e momentonan aki ta pa Aruba tuma pasonan necesario pa e siguridad nacional, mas ainda awor cu Venezuela a haya un momento nobo pa exigi fin di Nicolas Maduro cu tambe ta na Puebla, Mexico.

    E desaroyo aki ta nifica cu e guera ta den porta di Aruba, manera autoridad competente ta na haltura.

    Diasabra ta wordo calcula cu mas cu un Miyon Venezolano a subi caya pa protesta contra Maduro y asina kibra loke tabata crea e impresion cu e situacion actual na e pais ta normal.

    Pa Dialuna ta spera mas accion, manera Presidente Juan Guaidó a anuncia.

    E Organisacion di Estadonan Americano a mustra Morales cu su chens pa termina su periodo di gobernacion a pasa y cu e mester enfrenta eleccion nobo na Bolivia, cu tin tur atencion.

    Aruba ta den estado di alerta pa tur desaroyo, teniendo cuenta cu e magnitud di e problema politico actual den region di Caribe y e forsa cu resistencia na e avance comunista a haya na Bolivia.

    - Advertisement -

    DUNA COMENTARIO

    Please enter your comment!
    Please enter your name here