Ciencia habri lagando ningun hende atras
ORANJESTAD (AAN): E fecha di 10 November, tabata uno di Dia Mundial di Ciencia pa Desaroyo y Paz.
Celebra tur aña riba 10 November, Dia Mundial di Ciencia pa Desaroyo y Paz ta destaca e papel importante cu ciencia tin den sociedad y e necesidad pa involucra un publico mas amplio den debatenan tocante temanan emergente cientifico. E dia aki tambe ta subraya e importancia y relevancia di ciencia den nos bida diario.
Un relato suministra pa Rainbow Warriors International na Aruba, ta mustra cu desde su proclamacion door di UNESCO na 2001, Dia Mundial di ciencia pa Desaroyo y Paz a genera multiple proyecto concreto, programa y fondo pa ciencia rond mundo.
E obhetivonan di Dia Mundial di Ciencia pa Desaroyo y Paz ta pa: (*) Fortalece e concientisacion publico tocante e papel di ciencia pa sociedadnan pacifico y sostenibel. (*) Promove solidaridad nacional y international pa ciencia comparti entre paisnan. (*) Renoba compromisonan nacional y internacional pa e uso di ciencia pa e beneficio di sociedadnan. (*) Yama atencion pa e retonan enfrenta door di ciencia y aumenta e sosten pa esfuerzonan cientifico.
E asina yama UNESCO Recomendacion pa Ciencia y Investigador Cientifico ta un instrumento importante pa crea standardizacion, cual no solamente ta cofidica e metanan y sistema di valornan den e practica di ciencia, pero tambe ta enfatiza cu esakinan tin cu ser sosteni y proteha, pa ciencia por florece.
Un prome Recomendacion a ser adopta na 1974, y un Recomendacion Revisa a ser adopta 13 November 2017, remplazanda e texto e texti di 1974. E Recomendacion aki tin un valor particular awendia, incluso pa paisnan den desaroyo cu ta fortaleciendo nan capacidadnan y institucionan cientifico.
E Recomendacion ta mantene e principionan di e Declaracion Universal di Derecho Humano (cu cada persona tin e derecho di participa den y beneficia di ciencia) y ta provee un checklist util di requisitonan politico y institucional pa asegura acceso na educacion cientifico, y derechonan fundamental manera e derecho di bira y ta un cientifico, proteha propiedad intellectual, pa comparti avanzenan cientifico y libertad academico.
Tema 2019: “Ciencia habri, lagando ningun hende atras”
Ciencia Habri (Open Science) no ta solamente un cuestion cu ciencia mester ta habri pa henter e comunidad di investigador, manera sugeri pa “acceso habri” (open access) y “data habri” (open data) pero tambe mester nifica un ciencia habri pa henter sociedad.
Apesar di e progreso realiza den e ultimo añanan, ainda nos ta presencia gran disparidad entre y den diferente region y diferente pais ora ta trata di acceso na ciencia, tecnologia y inovacion (STI) y kende ta disfruta di e beneficionan. Pa atende cu e disparidadnan y cerra e buraconan existente di STI, Ciencia Habri ta un paso importante den e direccion correcto.
Comunicacion habri di dato cientifico, resultado, hipotesis y opinion, ta forma e nucleo di e proceso cientifico. Den e contexto aki, Ciencia Habri ta un creciente movimento global pa haci investigacion cientifico y datonan mas accesible pa un y tur.
Ciencia Habri tin e potencial di aumenta significativamente e colaboracion cientifico y descubrimento y facilita adopcion di tecnologia bon adapta. E por ta un “game changer” pa alcanza e Obhetivonan di Desaroyo Sostenibel, particularmente na Africa, paisnan den desaroyo y Small Island Developing States (Islanan Chikito Estado den Desaroyo).
Laga nos acepta Ciencia Habri como un herment pa haci ciencia mas accesibel, e proceso cientifico mas inclusivo y e resultadonan di ciencia mas facil disponibel pa un y tur.
Mensahe di Audrey Azoulay, directora-general di UNESCO, na ocacion di dia mundial di ciencia pa desaroyo y paz – 10 november 2019.
Central den 2030 Agenda pa Desaroyo Sostenibel, conoci di e Obhetivonan pa Desaroyo Sostenibel, Sustainable Development Goals, SDGs), ta e compromiso pa asegura cu “no ta laga ningun hende atras”. Awendia, manera den pasado e control riba conocimento ta conduci na desigualdad, exclusion y conflicto social. Awor cu nos planeta ta conta cu un number creciente di reto y desafio, manera cambio climatico, perdida di diversidad biologico y desasternan natural, e desaroyo di conocimento cientifico ta mas importante cu nunca.
Pa enfrenta e retonan aki, nos mester aumenta inversion den ciencia, investigacion y tecnologia, especialmente cu mira pa genera ideanan innovador.
E naturaleza global di e retonan aki ta rekiri un respuesta mundial- den cual tur hende den tur comunidad na mundo ta involvi. E enfoque inclusivo ta central den 2030 Agenda pa Desaroyo Sostenibel. Participacion tambe ta un caracteristico clave di ciencia mes, unda e inclusion di multiple disciplina den busca solucion y e difusion di investigacion ta yuda genera conocimento nobo.
Ciencia Habri ta aspira pa pone informacion, conocimento y dato cientifico disponibel pa un y tur.
Dor di amplia e acceso na informacion, e ta propone pa duna tur cientifico, innovador, ingeniero, entrepreneur y ciudadano e oportunidad pa observa, contribui y crea conocimento den e camponan di ciencia, tecnologia y innovacion.
E enfoque aki no solamente ta mehora transparencia y dunamento di cuenta (accountability), pero tambe ta yuda crea oportunidad igual pa un y tur, promoviendo e compromiso cu e cultura cientifico.
Pa pone un enfasis riba e metanan aki, UNESCO a escoge e tema “Ciencia Habri, lagando ningun hende atras” e aña aki pa e Dia Mundial di Ciencia pa Desaroyo y Paz.
UNESCO ta cla y dispuesto pa encabeza e dialogo mundial pa garantiza cu ciencia habri ta desaroya su potencial plenamente. Na e nivel internacional, Ciencia Habri por contribui na cerra buraconan existente den ciencia, tecnologia y innovacion den comunidad pa asegura cu e progreso cientifico y technologico ta beneficia un y tur y pa no laga ningun hende atras.
CIENCIA HABRI Y UNESCO ARUBA:
Na Aruba nos Comision Nacional di UNESCO encabeza pa su presidente Minister Rudy Lampe, no ta funcionando, ya cu e posicion di su Directora Zetsia Ponson no ta mucho cla, y e Science Liaision Officer, e meteorologo Marck Oduber a ser kita for di pia di trabao na Meteo Aruba pa locura di Minister Chris Romero, strobando e haci su trabao cientifico riba e temanan di cambio climatico y desasternan natural.
Ciencia Habri NO ta existi na Aruba, ya cu Gobierno y Universidad di Aruba ta persisti den usa e modelo anticua di e “Triple Helix” pa ciencia esta (1) Gobierno- (2) Mundo Academico- (3) Mundo Corporativo pa participacion den ciencia, tecnologia y innovacion, siendo e “Quadruple Helix” ta mandatorio awor den Union Europeo pa desaroyo regional y nacional, cual ta nificia cu ta (1) Gobierno- (2) Mundo Academico- (3) Mundo Corporativo – (4) Sociedad civil y ciudadano ta participa y colabora den ciencia, tecnologia y innovacion.
Loke ta nifica cu na Aruba pa razonan politico y presupuestario ta lagando hende atras, violando e tema central di e 2030 Agenda y e Obhetivonan pa Desaroyo Sostenibel y obstaculizando Ciencia Habri.
