Certificado lo facilita comercio entre e islanan
ORANJESTAD (AAN): Minister Xiomara Ruiz-Maduro a anuncia Dialuna atardi den presencia di Minister di Desaroyo Economico y Turismo di Corsow, Giselle Mc William kende tabata na Aruba hunto cu su conseheronan, cu a logra yega na un certificado di origen, cual ta un formulario pa yuda facilita comercio entre Aruba y Corsow.
Pa hopi tempo caba tabata tin negociacionnan andando pa por facilita e comercio entre e islanan. Tur cos ta tuma su tempo, a remarca. Te cu awo tabata uza e certificado europeo, cual lo bira obsoleto y tabata un oportunidad pa Aruba y Corsow traha riba un propio.
A traha ariba e parti aki y ayera e mandatarionan a sinta pa asina yega na un acuerdo caminda desde 1 di Januari 2020 ta bay tin un certificado di origen. Ta percura pa esaki ta den forma digital pa asina por bay facilita comercio entre Aruba y tambe Corsow.
Minister Ruiz Maduro a indica cu pa e comerciantenan esaki ta bay ta un bon noticia. El a anuncia tambe pronto y a base di e negociacionnan positivo lo firma un ‘onderlinge regeling vrijhandelszone’.
Esey ta nifica cu productonan di Corsow of productonan di Aruba cu ta wordo traha na cada un di e islanan ta pasa di un isla pa otro, den comercio, na un forma mas facil.
E mandatario a duna di conoce cu dialuna mainta nan a sinta tambe hunto cu Prome Minister Wever-Croes y cu Minister Romero pa locual ta trata e parti di conectividad, relatando na e plannan di e fast ferry entre Aruba y Corsow.
A elabora tambe ariba e aspecto di abastecimento di fruta y berdura y kico tur ta wordo haci aworaki pa yuda soluciona e problematica aki ocasiona pa e ciere di frontera cu Venezuela.
Den un otro articulo, Minister Mc William ta amplia.
Minister Ruiz Maduro a bisa cu tabata tin un bon reunion cu a mantene cu e ministernan, pero tambe e parti di departamentonan y a gradici Departamento Economico pa a guia e proceso na Douane pa locual ta e documento di origen.
El a gradici tambe Minister Mc William pa e iniciativa pa bin Aruba pa por traha pa esaki por a keda finaliza.
