Aumento compania stranhero ta peliger pa negoshi local

Economia di Aruba no tin espacio pa mas flexibilidad

*Nan ta cumpra personal entrena dor di empresa local

*Economia Aruba no tin espacio na competencia inhusto

ORANJESTAD(AAN)–Cu negoshinan chikito y mediano di Aruba ta enfrenta problema serio a bini dilanti na hopi ocasion y a keda confirma den e rapport di Banco Central, cu a investiga e gastonan pa haci negoshi na Aruba.

For di 2014 sinembargo, comercio local a pidi pa actua contra competencia inhusto cu negoshinan local ta enfrenta. Pasonan concreto no a wordo tuma for di 2014 mientras portanan a wordo habri despues pa mas compania stranhero establece nan mes na forma indirecto.

“Proyectonan manera e rehabilitacion di refineria, a habri porta pa entrada di cantidad di compania. Ora e proyecto a fracasa, nan a keda Aruba mescos cu a pasa na tur oportunidad cu a importa personal pa traha den expansion di economia. Cuanto mas comercio local por expande cu stranhero?”

E reclamo a wordo presenta na DIARIO. Ta parce cu personanan cu ta yega Aruba como trahado stranhero, ta keda na e pais y ta haci uzo di nan estadia como trahado pa habri negoshi.

DIARIO por a comprende cu e tactica aki ta bira posibel pasobra como trahado di un empresa, e stranheronan ta habri caminda pa nan yega na nan mes negoshi a base di nan lasonan cu nan pais.

Cu un permiso permanente nan ta pidi permiso pa nan habri negoshi y for di e momento nan ta competi na forma oficial contra comerciantenan local cu a carga tur problema di Aruba,” a wordo mustra.

Actualmente un problema serio ta wordo crea dor di e grupo di stranhero cu ta kita personal cualifica for di negoshi local. “E negoshi stranhero mester di Arubiano cualifica cu a ricibi training na empresanan Arubano. Hopi bes e stranheronan mes no tin e cualificacion rekeri pa nan atende cu e necesidadnan di un negoshi na Aruba. Sigur den turismo esaki ta un hecho,” a wordo treci dilanti.

Personal Arubano y tambe stranheronan cu a traha hopi tempo na Aruba, tin mas habilidad pa traha cu e turista Mericano cu ta e grupo mas grandi di turista na Aruba.

Companianan Arubano semper a yuda nan trahadonan den desaroyo. Awor por nota con e trahadonan aki ta haya oferta di negoshinan nobo di stranhero cu a haya permiso pa keda Aruba.

E situacion peligroso pa comerciantenan Arubano den un tempo dificil, tin atencion di DIARIO cu lo sigui atende e asunto aki mientras Aruba ta drenta su temporada halto di turismo y dianan di fiesta cu ta sumamente importante pa negoshinan local cu no por cu competencia creciente pa cual autoridad mester tin mas atencion.