Awe Reino y Aruba na mesa pa decision crucial

    902
    0
    SHARE
    - Advertisement -

    Conseho oficial na gobernador a rechasa entrada y salida Eman

    *Cu impresion falso Mike Eman a kibra stabilidad di Aruba

    *Cu prueba den man DIARIO ta entrega berdad regimen Eman 

    ORANJESTAD(AAN)–Awe na Den Haag Hulanda,  ta tuma luga e encuentro entre Ministro Presidente di Aruba, mr. Evelyn Wever-Croes cu e Minister Hulandes actualmente encarga cu Relacionnan den Reino, Raymond Knops. E encuentro aki ta directamente relaciona cu e reunionnan entre Aruba y Reino pa por yega na un solucion pa Aruba.

    Reino Hulandes mester dicidi si ta pone Aruba bou supervision debi na e situacion serio cu Aruba conoce riba tereno financiero y economico.

    E motibo directo pa e reunion di awe, ta e situacion financiero actual di Aruba, cu a desaroya su mes for di 2009 ora na un forma descabeya y contra conseho oficial, ex ministro presidente mr. Mike Eman a dicidi di honra su promesa di campaña 2009 cu a pone na mando di Aruba.

    Sin ningun reserva y preparacion debido, Mike Eman a hinca Aruba den un situacion sin salida, cu el a prolonga a lo largo di su termino como Ministro Presidente cu a caba na 2017.

    E herencia cu el a entrega Aruba ta bini dilanti den un cantidad di rapport oficial cu DIARIO a studia y a investiga pa yega na e motibonan pa cual awe, Aruba ta den un situacion sumamente dificil y pa cual hunto cu Reino Aruba mester yega na un solucion.

    Rapportnan oficial ta sostene e acusacionnan cu awe DIARIO ta lansa den direccion di e gobierno di Mike Eman na momento cu e Ministro Presidente nobo di Aruba, Evelyn Wever-Croes mester entrega Reino un plan pa e futuro di Aruba.

    Cuentanan anual cu Algemene Rekenkamer Aruba ta produci ta duna un bista cla kico a pasa cu financia di Aruba y e peliger grandi cu regimen Mike Eman a produci pa Aruba.

    Den rapportnan di Banco Central ta bini dilanti e insiguridad financiero y monetario cu a compaña Aruba for di 2010 ora e entrada di e pais a baha a base di e salida di Valero, cu regimen Mike Eman no a contraresta cu medidanan pa subi e entrada di Aruba pero a baha cu reduccion di BBO y medidanan popular cu a wordo tuma.

    Importante ta pa mustra pueblo cu e decision di Mike Eman pa baha BBO na mita, no tabata tin aprobacion di Raad van Advies, cu a bay contra di e paso aki cu lo a hinca Aruba den problema serio.

    Informacionnan di DIARIO awe ta duna Aruba tur prueba di e forma cu regimen di Mike Eman a atende cu e placa di Aruba for di 2009 ora mester a haci un prestamo di casi 100 Miyon pa balansa e situacion financiero.

    Cu e maneho di Mike Eman tabata peligroso pa Aruba ta bini dilanti den e cuentanan anual pero sigur den e rapport di Conseho Social Economico den cual sindicato, comercio y expertonan ta uni y cu na 2014 a yega na e conclusion cu Aruba tabata den un crisis grandi cu tabata haci medida necesario.

    Rapportnan di CAFT y exigencianan Hulandes cu Mike Eman a sconde tras di e forma cu el a atende cu Hulanda cu welga di hamber, ta mustra riba tur clase di falta di responsabilidad gubernamental.

    Den rapport oficial creacion di impresion financiero falso dor di regimen Eman ta bini dilanti.

    Raad van Advies den su cartanan na Gobernador manera ley ta stipula, ta rechasa e proposicionnan di regimen Mike Eman pa calculacion financiero di Aruba na entrada y salida di regimen Mike Eman.

    E forma cu Mike Eman a kibra siguridad financiero di Aruba cu reduccion BBO mescos cu e cifranan cu Mike Eman a prepara pa 2017, NO a haya aprobacion di Raad van Advies.

    E berdad di e desaster financiero di Aruba ta bini dilanti den cuentanan anual di e autoridad financiero di Aruba y rapportnan oficial di cual Bo Aruba ta den man di autoridad penal.

    Awe e combersacionnan na Den Haag ta cuminsa den intento di Reino y Aruba pa bandona e desaster historico cu regimen Mike Eman a crea y a laga atras pa Aruba.

    - Advertisement -

    DUNA COMENTARIO

    Please enter your comment!
    Please enter your name here