Home Hudicial Awe tin sentencia pa homber sospecha di a malversa varios hende pa...

Awe tin sentencia pa homber sospecha di a malversa varios hende pa asilo

115
0
SHARE
- Advertisement -

ORANJESTAD (AAN) – Awe mainta e homber R.G. mester presenta den Corte pa e scucha decision di Hues den e caso penal cu Ministerio Publico a cuminsa contra dje. Fiscal ta haya R.G. culpable di malversacion y a exigi pa Hues prohibi R.G. pa laga pasa como abogado y traha como consehero juridico.

Fiscal a exigi 12 luna di prison di cual 4 luna ta condicional cu un tempo di prueba di 3 aña. Tambe Fiscal a exigi pa ehecuta e 12 luna di prison cu tabata condicional.

Abogadonan mr. Rasmijn y mr. Martinus a hiba un defensa hopi extenso pa mustra cu ningun di e acusacionnan no ta legalmente prueba y cu nan ta haya cu mester declara R.G. liber di tur acusacion.

MALVERSACION PA ASILO

Tratamento di e caso a tuma lugar algun siman pasa caminda Fiscal a bisa cu e acusacion contra R.G. ta cu entre September 2018 y 28 Maart 2019, a haci malversacion di cantidad di hende extranhero cu peticion di asilo politico. Fiscal tambe a exigi Hues pa impone e castigo condicional di 1 aña di prison cu tabata colga riba cabez di R.G. pa un caso similar di malversacion y falsificacion di firma.

Hues a bisa R.G. cu Fiscal ta acus’e di a laga mustra cu ta abogado siendo cu e no ta. A crea impresion cu lo tin un procedura di asilo y a cobra hendenan extranhero cantidad di placa pa regla asilo. R.G. a bisa Hues cu e no ta di acuerdo cu esaki. Segun R.G., como consehero legal,  el a duna servicio y a cobra pa esaki. Hues a mustra cu ta hendenan ilegal. Segun R.G. e no tabata sa cu nan ta ilegal.

GRUPO DI EXTRANHERO TA ACUSA

Hues a mustra riba declaracion di un persona cu tabata ilegal na Aruba na 2015 y a wordo saca y a bin bek y kier pidi asilo. El a conoce R.G. como e persona cu a bisa cu e ta abogado y lo por traha carta cu nan no por wordo saca. E persona tabata cu otro cinco. El a bisa cu R.G. a bisa nan cu e procedura lo dura 12 siman y asina mes por reacciona contra e conseho di Dimas pa Gobierno of por cuminsa un caso pa haya un conseho si ta tarda mas cu 12 siman. E persona a bisa cu nan, 6 persona, mester a paga 1500 florin cada un pa e carta.

Fiscal a remarca cu segun Dimas, e peticion no tabata duna suficiente informacion di esun cu ta pidi asilo. Segun R.G. den tur peticion tin nomber, adress y telefoon di esun cu ta haci e peticion. E ta haya cu loke Dimas ta bisa, no ta corecto.

Hues a mustra cu na 2017, R.G. a haya castigo di 30 luna di prison di cual 12 luna ta condicional. E castigo ta relacion cu malversacion y falsifica carta y firma.

Ta asina cu R.G. ta un dialyses patient y ta sufri di curason. R.G. a reclama cu no ta facil na KIA pasobra e no ta haya e ayudo necesario. El a bisa cu e mester a warda 4 luna promer cu e por bay un cardiologo.

EXIGENCIA DI FISCAL

Fiscal a bisa Hues cu R.G. ta bisa cu pa motibonan politico e ta wordo persigui. Pero R.G. no ta un abogado y no a traha peticion pa asilo siendo cu el a pone hendenan paga pa esaki. Ta trata aki di ilegalnan cu no tin conocemento di procedura di asilo y ta cobra nan placanan. Segun Fiscal, Dimas ta mustra cu e cartanan cu R.G. a duna Dimas pa e extranheronan, no ta suficiente documenta. Fiscal ta haya cu e extranheronan tabata paga hopi placa pa un carta standard. Fiscal ta haya cu R.G. a mal usa e situacion di e hendenan cu tabata busca asilo. Fiscal a remarca cu R.G. tin oficina cu un toga di abogado colga den e oficina cu ta laga mustra cu e ta un abogado. Fiscal a mustra cu un trahador di R.G. a remarca cu el a bisa R.G. cu e ta cobra demasiado pa e carta. Na opinion di Fiscal, R.G. tabata traha pa su probecho financiero personal.

Fiscal a bisa cu no ta promer biaha cu R.G. ta haci su mes culpable di malversacion, falsificacion. E ta haya cu mester prohibi R.G. pa laga pasa como abogado y traha como consehero juridico. Fiscal a exigi 12 luna di prison di cual 4 luna ta condicional cu un tempo di prueba di 3 aña. Tambe Fiscal a exigi pa ehecuta e 12 luna di prison condicional. Fiscal tambe a bisa Hues cu tur e cosnan confisca den oficina di R.G. lo mester keda confisca.

Abogadonan mr. Rasmijn y mr. Martinus ta haya e acusacionnan cu Fiscal a presenta, no ta funda. E abogadonan ta haya cu R.G., como consehero juridico, a actua corectamente y no por bisa cu el a malversa hende.

Hues a palabra cu awe 15 di November 2019, e ta dicta sentencia. DIARIO lo informa lectornan tur loke sosode den sala di Corte di Husticia di Aruba.

 

- Advertisement -

DUNA COMENTARIO

Please enter your comment!
Please enter your name here