Home Policial Awor si tin suficiente prueba pa a duna orden pa detene Robbie...

Awor si tin suficiente prueba pa a duna orden pa detene Robbie dos Santos

967
0
SHARE
- Advertisement -

ORANJESTAD (AAN): Siman a habri, cu e noticia grandi procedente di St. Maarten, unda cu un razzia a tuma lugar mainta trempan.

Oficialnan di Polis hunto cu Recherche Samenwerkings Team (RST), a drenta den accion y inespera a presenta na cas di un ciudadano, pa asina areste.

E doño di e cas ta e conocido bigwheeler Robbie dos Santos, naci na Curacao.  Ministerio Publico na Curacao a confirma e detencion, y a mustra cu enberdad e ta relaciona cu e famoso “Caso Maximus”.

“Caso Maximus” ta e investigacion pa haya sa kende ta tras di e asesinato prepaid di e politico Curasoleño Helmin Wiels, kende a wordo tira mata dia 5 di Mei 2013 door di Elvis ‘Monster’ Kuwas, kende ya caba a ricibi castigo di bida largo di prison.

Na luna di Augustus cu a pasa, e ex-Ministro di Finanzas George Jamaloodin (kende ta mitar ruman di Robbie dos Santos), a wordo haya culpable di a provoca e asesinato di Helmin Wiels, y pa esey el a paga un suma desconoci di placa.  Pero autoridad tabata convenci cu e no a actua su so, y a ricibi placa di otro personanan pa planea e asesinato pre-paga.

Robbie dos Santos cu ta wordo considera “Rey di Loteria”, a yega di worde deteni caba como sospechoso.  Pasobra a cuminza check den e posibilidad cu e mes a ordena su mitar ruman homber Jamaloodin pa likida Helmin Wiels. Robbie a worde sospecha caba den e investigacion pero aparentemente no a haya prueba e tempo ey.

Jamaloodin a wordo sentencia na 28 aña di prison.

Kico a cambia awor?  Posiblemente tin declaracionnan haci contra Robbie, pues ta bisto cu e investigacion “Caso Maximus” keto bay andando lo tin luz na horizonte pero esaki lo mester worde proba.

   PAKICO MATA WIELS:

E pensamento di hopi hende y tambe di Ministerio Publico, ta e hipotesis cu Robbie dos Santos lo kier a mata Helmin Wiels, pasobra e Parlamentario ey a cuminza ta investiga e negoshi di loteria tanto na Curacao y St. Maarten.  Djis prome cu el a wordo mata, Helmin Wiels a lanza acusacion cu e sector di loteria ta ocupa ta ontduik belasting y tambe ta cometiendo fraude.

Wiels a hasta zwaai cu algun documento den su man, mustrando cu e tin prueba cu por incrimina diferente persona, si acaso algo pasa cune.

E biaha aki, e detencion di Robbie dos Santos a wordo haci, despues cu Huez Comisario na Curacao a duna OK pa detene e big wheeler.  E pruebanan cu a ser presenta dilanti Huez Comisario, ta suficiente pa ordena detencion di Robbie dos Santos pa 8 dia largo, pa asina interogacion cuminza.

E prome paso ta pa Husticia dicidi si acaso ta duna OK pa transferi Robbie dos Santos bek pa Willemstad pa asina e interogacion y investigacion por sigui.

 

- Advertisement -

DUNA COMENTARIO

Please enter your comment!
Please enter your name here