“Nos no ta bira otro Venezuela” Forsa Arma y pueblo a grita
ORANJESTAD (AAN)– Mundo liber riba Diadomingo a aplaudi e forma cu pueblo di Bolivia a actua ora el a baha Evo Morales, cu a asumi presidencia di e pais atrobe despues di a reclama di a gana eleccion.
“Nos no ta bira otro Venezuela,” tabata e expresion di e pueblo di Bolivia cu a uni y a baha Morales cu ya a bay contra tur ley pa mantene su puesto como presidente di e pais.
E suspenso tabata grandi mientras ehercito, trahadonan y henter pueblo a uni den un solo forsa pa exigi Morales di baha como presidente despues cu oficialmente a keda estableci cu el a falsifica eleccion.
Di e forma aki e kier a ripiti e maniobranan di Nicolas Maduro cu a hunga cu constitucion, eleccion y hasta a cambia e representacion eligi di pueblo pa asina a keda na poder.
Forsa Arma di Bolivia a nenga di bay contra pueblo y na fabor di Morales cu a papia di un golpi di estado despues cu rond Bolivia pueblo na forma violento a lanta para.
Paisnan comunista tabata expresa nan apoyo na Morales pero esaki tabata tin poco influencia riba e pueblo di Bolivia, cu a cuminsa cu atake riba exponentenan di e regimen Morales. Uno tras otro ministronan a baha y na final Morales cu kier a convoca otro eleccion, mes mester a retira.
Pa e cadena comunista e desaroyonan tabata un bofta mientras cu mundo liber a sostene pueblo di Bolivia cu a nenga di bira otro Venezuela manera tabata declaracionnan cu a wordo haci na medionan di comunicacion a mustra. Na pagina 27 por lesa un relato amplio.
